އައްޑޫގެ ކުނި މެނޭޖް ކުރަން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން އިއްޔެ ފަށާފައިވާ އިރު، ހިދުމަތް ހޯދަން އަލުން ރަޖިސްޓްރީ ވާން ޖެހޭނެ ކަމަށް އެ ކުންފުނިން ބުނެފި އެވެ.
ވެމްކޯގެ މެޖެނިން ޑިރެކްޓަރު އިބްރާހީމް ފުއާދު ވިދާޅުވީ ކުރިން އެމްއާރްޑީސީން ދެމުން ގެންދިޔަ ހިދުމަތް ވެމްކޯ އަށް ބަދަލު ކުރުމުގެ މަރުހަލާ މިހާރު ކުރިއަށްދާ ކަމަށެވެ.
އޭނާ ވިދާޅުވީ އެމްއާރްޑީސީގައި ރަޖިސްޓްރީވެފައިވާ ފަރާތްތައް ރަޖިސްޓްރީކޮށް ދިނުން، ވެމްކޯގެ މުވައްޒަފުން މިހާރު ކުރިއަށް ގެންދާ ކަމަށެވެ.
އެގޮތުން ކުނި ނަގަންދާ އިރު، ވެމްކޯގެ މުވައްޒަފުން ފޯމްތައް ފުރައި، ރަޖިސްޓްރީކޮށް ދޭނެ ކަމަށް ވިދާޅުވި އެވެ.
މީގެ އިތުރުން ހިތަދޫގައި ހުންނަ ވެމްކޯގެ އޮފީހުން ވެސް ފޯމް މިހާރު ލިބެން ހުންނާނެ އެވެ. އެ އޮފީސް ހުންނަނީ ހިތަދޫ ބޮޑުމަގުގައި ހުންނަ ޝީޝާ ޝޯރޫމް ކައިރީގަ އެވެ.
ފުއާދު ވިދާޅުވީ ވެމްކޯ އިން ކުނީގެ ހިދުމަތް ދެނީ، އެމްއާރްޑީސީން ހިދުމަތް ދެމުން ގެންދިޔަ އަގުތަކަށް ވުރެ ހެޔޮކޮށް ކަމަށެވެ.
އެމްއާރްޑީސީން ހަފުތާއަކު ތިން ދުވަހު ގޭބިސީތަކުން ކުނި ނަގައި ދިނީ މަހަކު 159ރ. އަށެވެ.
ވެމްކޯ އިން ގޭބިސީތަކުން ކުނި ނަގާނީ ހަފުތާ އަކު ތިން ދުވަހު، މަހަކު 100ރ. އަށެެވެ.