އައްޑޫގައި ވެސް ވަަރަށް ބޮޑު ބައި ޝޫޓްކޮށްފައިވާ މުހައްމަދު ނިޔާޒް (ޓެޑްރީ) ގެ ކާމިޔާބު ފިލްމް "އަމާނާތް" މިއަދު ޔޫޓިއުބަށް ލައިފި އެވެ.
މި ފިލްމަކީ 1998 ވަނަ އަހަރު ރިލީޒްކޮށްފައިވާ ފިލްމެކެވެ. ފިލްމް ރިލީޒް ކުރިތާ 19 އަހަރު ފަހުން، ޔޫޓިއުބުން ފިލްމް ބެލޭނެ ގޮތް މި ހެދީ މިދިޔަ ފެބްރުއަރީ މަހުގެ ތެރޭގައި ފިލްމުގެ ވަރަށް ކާމިޔާބު ޝޯތަކެއް ސްކްރީންގައި ދެއްކުމަށް ފަހު އެވެ.
"އަމާނާތް" ޔޫޓިއުބަށްލި އިރު، މީގެ ވަގު ކޮޕީއެއް ވެސް ބަޔަކު ދަނީ ގެންގުޅެމުންނެވެ.
ޓެޑްރީ ކުރި ޓްވިޓެއްގައި ބުނީ "އަމާނާތް" ޔޫޓިއުބުން ބެލޭނެ ގޮތް ހަދައި ދިނީ، މުނިފޫހި ފިލިވުމުގެ ދާއިރާ އަށް ހިދުމަތް ކުރާތާ 30 އަހަރު ވެސް މި މަހުގެ 9 ވަނަ ދުވަހު ފުރޭތީ އެކަމާ ވެސް ގުޅުވައިގެން ކަމަށެވެ.
މަހުދީ އަހުމަދު ޑައިރެކްޓްކޮށްފައިވާ "އަމާނާތް" ގައި ލީޑް ރޯލް ކުޅެފައި ވަނީ އަލީ ހާލިދާއި ޖަމްޝީދާ އަހުމަދުގެ އިތުރުން ފާތުމަތު ރަމީޒާ އެވެ.
މި ފިލްމަކީ 1983 ގައި ރިލީޒް ކުރި ހިންދީ ފިލްމް "މާސޫމް" އަސްލަކަށް ބަލައިގެން ހަދާފައިވާ ފިލްމެކެވެ.
"އަމާނާތް" ވަނީ ތިން ވަނަ ގައުމީ ފިލްމް ފެސްޓިވަލްގައި 12 އެވޯޑް ހޯދާފަ އެވެ.