ބްރިޓްނީގެ ކޮންސެޓަކާއި ދިމާވާތީ އިޒްރޭލުގެ ލޭބާ ޕާޓީގެ ޕްރައިމަރީ ފަސްކޮށްފިއެވެ.
އިޒްރޭލުގެ ތެލްއަވީވްގައި ބްރިޓްނީގެ ކޮންސެޓް ޖުލައި މަހުގެ 3 ވަނަ ދުވަހު ބޭއްވުމަށް ނިންމާފައިވާއިރު މިއީ އޭނާ އެ ސިޓީގައި ޕާފޯމްކުރާ ފުރަތަމަ ފަހަރެވެ.
ލޭބާ ޕާޓީގެ ތަރުޖަމާނަކާއި ހަވާލާދީ ޓައިމްސް އޮފް އިޒްރާއީލް ގައި ބުނެފައި ވަނީ އެ ޕާޓީގެ ޕްރައިމަރީ ފަސްކުރީ ކޮންސެޓްގެ ސަބަބުން ސެކިއުރިޓީ ގާޑުން ނެރުމަށް ދަތިވާނެތީ ކަމަށެވެ. އަދި މީގެ އިތުރުން ކޮންސެޓް އޮންނަ ދުވަހު އިންތިހާބު ބާއްވައިފި ނަމަ ޓްރެފިކް ބާރު ބޮޑުވެ މީހުންނަށް ވޯޓުލާ މަރުކަޒުތަކަށް ދަތިވެދާނީ ކަމަށް އޮފިޝަލް ބުންޏެވެ.
"މިގޮތަށް ނިންމުމުގެ ސަބަބުން މީހުންނަށް ވޯޓުލާ މަރުކަޒުތަކަށް ދިއުމަށް ފަސޭހަވެގެންދާނެ" ލޭބާ ޕާޓީގެ އޮފިޝަލަކު ބުންޏެވެ.
ލޭބާ ޕާޓީން ޖުލައި މަހުގެ 3 ވަނަ ދުވަހު ބޭއްވުމަށް ކުރިން ނިންމާފައިވާ ޕްރައިމަރީ ދެން ބާއްވާނީ ޖުލައި 4 ގައެވެ.