"އެމް އެސް ދޯނި: ދި އަންޓޮލްޑް ސްޓޯރީ" އަށް ފަހު ނީރާޖް ޕާންޑޭ ޑައިރެކްޓް ކުރާ އާ ފިލްމް "އައްޔާރީ" ގެ ކާސްޓް އިއުލާންކޮށް، ފިލްމުގެ ޕޯސްޓަރު ދައްކާލައިފި އެވެ.
މި ފިލްމުގެ ލީޑް ރޯލުން ފެނިގެން ދާނީ ސިދާތު މަލްއުތުރާ އާއި މަނޯހް ބަޖްޕާއީ އެވެ.
"އައްޔާރީ" އަށް ސިދާތު ސޮއި ކުރި އިރު، އޭނާ އެންމެ ފަހުން ފެނިގެން ދިޔަ ފިލްމަކީ މި އަހަރުގެ ކުރީކޮޅު ރިލިޒް ކުރި "ބާރް ބާރް ދޭކޯ" އެވެ. އެކަމަކު އެއީ ބޮޑު ފްލޮޕެކެވެ.
މަނޯގްޖެ އެންމެ ފަހުން ފިލްމަކީ މިހާރު ސިނަމާތަކުގައި ދައްކަމުން އަންނަ "ނާމް ޝަބާނާ" އެވެ.
ނީރަޖް ޕާންޑޭ ބުނީގެ "އައްޔާރީ" އާ ބެހޭ މާ ބޮޑު ތަފުސީލެއް އަދި ހާމަކޮށްފައި ނުވި ނަމަވެސް، ފިލްމް ރިލީޒް ކުރާ ތާރީހު ވަނީ އިއުލާންކޮށްފަ އެެވެ.
މި ފިލްމް ސިނަމާތަކަށް އަންނާނީ ޖެނުއަރީ 26، 2018 އެވެ.
"އައްޔާރީއާ" ބެހޭ ގޮތުން ސިދާތު ބުނީ ނީރަޖްގެ ފިލްމެއްގައި މަސައްކަތްކޮށްލަން ލިބުމުން ވަރަށް އުފާވެފައިވާ ކަމަށާއި މި ފިލްމަކީ ވަރަށް ޝައުގުވެރި ފިލްމަކަށް ވާނެ ކަމަށެވެ.
"ފިލްމުގެ ޝޫޓިން ފަށަން ކެތްމަދުވެފައި މިހިރީ،" ކަރަން ޖޯހަރްގެ "ސްޓޫޑަންޓް އޮފް ދި އިޔާ" އިން 2012 ގައި ބޮލީވުޑަށް ނިކުތް 32 އަހަރުގެ އެކްޓަރު ބުންޏެވެ.
އޭނާ ދެން އެންމެ އަވަހަށް ފެނިގެން ދާނީ ޖެކޮލިން ފެނާންޑޭޒާއާ އެކު "ރިލޯޑް" އިންނެވެ.