ފަލަކޮށް ތިބޭ އަންހެނުންނާ ކައިވެނި ކުރުމުން ދިރިއުޅުން މާ ބޮޑަށް ވެސް އުފާވެރި ކަމަށާއި އެއީ އުމުރު ވެސް ދިގުވާ ކަމެއް ކަމަށް ފަހުގެ ދިރާސާއަކުން ދައްކައިފި އެވެ.
އާޖެންޓީނާގެ ޔޫއެންއޭއެމްގެ ޑިޕާޓްމަންޓް އޮފް ސައިކޮލޮޖީގެ ދެ ޑޮކްޓަރުން ކަމަށްވާ ޑރ. ފިލެމަން އަލްވަރާޑޯ އާއި ޑރ. އެޑްގާޑޯ މޮރަލްސް ހެދި ދިރާސާއާ ހަވާލާދީ އާޖެންޓީނާގެ ނޫހަކުން ރިޕޯޓްކޮށްފައިވާ ގޮތުގައި އެ ދިރާސާ އިން ހާމަވި ގޮތުގައި ފަލަކޮށް ތިބޭ އަންހެނުންނަކީ އެ މީހުންގެ ލޯބިވެރިޔާ ނުވަތަ ފިރިމީހާއާ ދޭތެރޭ ވަރަށް ސީރިއަސްކޮށް، ވިސްނައި އެ މީހުން އަބަދު ވެސް އުފަލުގައި ބައި ތިއްބަން ބޭނުންވާ ބައެކެވެ.
އެގޮތުން ބައިވެރިޔާ އުފާވާ ކަހަލަ ކަންތައްތައް ކުރަން ފަލަ އަންހެނުން ވަރަށް ބޮޑު ސަމާލު ކަމެއް ދޭކަން ދިރާސާ އިން ވަނީ ހާމަވެފަ އެވެ.
މި ދިރާސާގައި އަދި ބުނީ ފަލަ އަންހެނުންނަކީ ހިިކިކޮށް ތިބޭ އަންހެނުންނާ އަޅާބަލާ އިރު، ބައިވެރިޔާ އުފަލުގައި ބަހައްޓަން 10 ގުނަ މަސައްކަތް ކުރާ ބައެއް ކަމަށެވެ.
އެ ދިރާސާގައި ބުނީ ހިކިކޮށް ތިބޭ އަންހެނުންނަކީ ބައިވެރިޔާއާ އޮންނަ ގުޅުން އެހާ ރަނގަޅު ނޫން، ބީރައްޓެހި ގޮތެއް ހުންނަ އަދި ކަންކަމާ ދޭތެރޭ ދެކޭ ގޮތް ހިއްސާ ކުރުން މަދު ބައެއް ކަމަށެވެ.
އެކަމަކު އެއާ ހިލާފަށް ފަލަ އަންހެނުންނަކީ ކަންކަން ވަރަށް ބޮޑަށް، ބައިވެރިޔާއާ ހިއްސާ ކުރާ، ބައިވެރިޔާގެ ބޭނުންތައް ދެނެގަތުމުގެ ހުށިޔާރުކަން ބޮޑު ބައެކެވެ.
އެހެންވެ މި ދިރާސާ އިން ސާބިތުކޮށް ދިން ކަމަކީ ލޯބިވެރިޔާ ނުވަތަ އަނބިމީހާ ފަލަކޮށް ހުރުމަކީ މައްސަލައަކަށްވެގެން އުޅެން ފިރިހެން ނުޖެހޭ ކަމެވެ.
މިއީ ކައިވެންޏަކަށް އަލަށް ކުރިމަތިލާ ޒުވާނުން ވިސްނާލުން ވެސް ހަގީގަތުގައި ރަނގަޅު ކަމަކަށް ވެދާނެ އެވެ.