އަކްޝޭ ކުމާރަކީ މިހާތަނަށް ކާމިޔާބު އެތައް ފިލްމެއް ކުޅުނު ނަމަވެސް، އިންޑިއާގައި ދެވޭ މަޝްހޫރު އެއްވެސް އެވޯޑް ހަފުލާއެއްގައި އެންމެ މޮޅު އެކްޓަރުގެ އެވޯޑް ލިބުނު ތަރިއެއް ނޫނެވެ.
މިކަމާ ގުޅިގެން އެވޯޑްތަކަށް ވަރަށް ބޮޑެތި ފާޑު ކިޔުންތައް ވެސް އަމާޒުވެ އެވެ.
މިދިޔަ އަހަރަކީ ވެސް އަކްޝޭގެ ވަރަށް ކާމިޔާބު ފިލްމުތަކެއް ރިލީޒްވި އަހެރެކެވެ. އެގޮތުން އޭނާގެ "ރުސްތުމް" އާއި "އެއާލިފްޓް" ފަދަ ފިލްމުތަކުގައި އަކްޝޭ ދައްކައިފައިވާ އެކްޓިން އަށް ގިނަ ބަޔަކު ތައުރީފުކޮށްފައިވެ އެވެ.
އެކަމަކު ޕޮޕިއުލާ އެވޯޑް ސީޒަން ނިންމައިލީ މިއިން ފިލްމަކުން އަކްޝޭ އަށް އެންމެ މޮޅު އެކްޓަރުގެ އެވޯޑް ނުލިބި އެވެ.
އެކަމާ އަކްޝޭ ގައިމު ވެސް މިހާރު ދެރައެއް ނުވާނެ އެވެ. އިންޑިއާ ސަރުކާރުން ދޭ ނެޝަނަލް އެވޯޑް މި ފަހަރު ލިބޭ ފަރާތްތައް އިއުލާން ކުރި އިރު، އެންމެ ބޮޑު އުފަލެއް ލިބުނު އެކަކީ އަކްޝޭ އެވެ.
"ރުސްތުމް" ގައި އޭނާ ކުޅުނު ރޯލުން ވަނީ އެންމެ މޮޅު އެކްޓަރުގެ އެވޯޑް ލިބިފަ އެވެ. މިކަމާ ގުޅިގެން، އަކްޝޭ އަށް އެއް ބަޔަކު މަރުހަބާ ކިޔަމުން އަންނަ އިރު، ނެޝަނަލް އެވޯޑް އޭނާ އަށާް ހައގު ނުވާ ކަމަށް ބުނެ، ބައެއް މީހުން ދަނީ މަލާމާތް ވެސް ކުރަމުންނެވެ.
ފަސްދޮޅަސް ހަތަރު ވަނަ ނެޝަނަލް އެވޯޑަށް ބަލާ އިރު، މި ފަހަރު އެންމެ މޮޅު ހިންދީ ފިލްމަކަށް ހޮވުނީ ސޯނަމް ކަޕޫރު ޓައިޓްލް ރޯލް ކުޅުނު "ނީރްޖާ" އެވެ.
* އެންމެ މޮޅު ބަތަލާ: ސްރާބީ ލަކްޝްމީ (މިންނަމިނުންގާ)
* އެންމެ ސަޕޯޓިން ބަތަލާ: ޒައިރާ ވަސީމް (ޑަންގަލް)
* އެންމެ މޮޅު ޑައިރެކްޓަރު ރާޖޭޝް (ވެންޓިލޭޓާ)
* އެންމެ މޮޅު ވިޝުއަލް އިފެކްޓްސް: ޝިވާއޭ
* އެންމެ މޮޅު އިޖުތިމާއީ ފިލްމް: ޕިންކް
* އެންމެ މޮޅު ކުޑަކުދިންގެ ފިލްމް: ދަނަކް
* އެންމެ މޮޅު ތަމަޅަ ފިލްމް: ޖޯކަރް
* އެންމެ މޮޅު ކަންނާޑާ ފިލްމް: ރިޒަވޭޝަން
* އެންމެ މޮޅު މަލަޔާޅަމް ފިލްމް: މަހެޝިންޓޭ ޕްރަތިކާރަކް