ހުޅުމީދޫ ޕޮލިސް ސްޓޭޝަން ތެރެއަށް މިއަދު ހެނދުނު މީހަކު ވަދެ އެ ރަށު މީހަކު ފުލުހުންނަށް ހަމަލާދީ މާރާމާރީ ހިންގައިފި އެވެ.
"އައްޑޫ ލައިވް"އަށް އިތުބާރު ހުރި ގޮތަކަށް އެނގިފައިވާ ގޮތުގައި މިއަދު ހެނދުނު 10:30 އެހާކަށްހާ އިރު މި ހާދިސާގައި ޕޮލިސް ސްޓޭޝަނަށް ވަދެ މާރާމާރީ ހިންގާފައި ވަނީ މީދޫ ޕްރިމްރޯސް، ހުސެއިންދީދީ، 47، އެވެ.
މީދޫން ވާހަކަ ދެއްކި މީހަކު ބުނީ ހުސެއިންދީދީ ޕޮލިސް ސްޓޭޝަނަށް ވަދެ މާރާމާރީ ހިންގާފައި ވަނީ އޭނާގެ ދަރިފުޅު ކޮންމެވެސް މައްސަލައެއްގައި ފުލުހުންގެ ބެލުމުގެ ދަށަށް ގެނައުމަށް ކުރި މަސައްކަތުގެ ތެރޭގައި އޭނާގެ ބޯފަޅައިގެން ދިއުމާ ގުޅިގެން އެކަމުގެ ރުޅީގައި ކަމަށެވެ.
ފުލުހުންގެ މީޑިއާ އޮފިޝަން ހަސަން ހަނީޕް މިރޭ ވިދާޅުވީ މިއަދު ހެނދުނުގެ ވަގުތެއްގައި ހުޅުމީދޫ ޕޮލިސް ސްޓޭޝަން ތެރެއަށް ވަދެ މީހަކު މަރާމާރީ ހިންގާފައިވާ ކަމަށެވެ.
އޭނާ ވިދާޅުވީ އެ ހާދިސާގައި ދެ ފުލުހަކަށް ހަމަލާ ދީފައިވާ ކަމަށެވެ، އަދި އެ ދެފުލުހުން ހުޅުމީދޫގައި ހުންނަ ސިއްހީ މަރުކަޒަށް ގޮސް ފަރުވާ ހޯދާފައިވަ ކަމަށެވެ. ނަމަވެސް ލިބިފައިވާ ގެއްލުމުގެ ތަފުސީލެއް ހަނީފް ނުދެއްވަ އެވެ.
މި ހާދިސާ އާ ގުޅިގެން ހުސެއިންދީދީ މިހާރު ވަނީ ފުލުހުންގެ ބެލުމުގެ ދަށަށް ގެނެވި މައްސަލަ ވަނީ ތަހުގީގް ކުރަން ފަށާފަ އެވެ.
މީދޫން ވާހަކަ ދެއްކި މީހަކު ބުނީ ހުސެއިންދީދީ ފުލުހުން ހައްޔަރު ކުރުމާ ގުޅިގެން އޭނާގެ އާއިލާގެ ބަޔަކު ޕޮލިސް ސްޓޭޝަން ދޮށަށް އެއްވެ އޭނާ ދޫކޮށްލުމަށް ބުނެ އަޑު އުފުލާފައިވާ ކަމަށެވެ.