މޯލްޑިވިއަން އައިޑޮލް ސީޒަން ދޭއްގެ ގަދަ 16 އިން ޖާގަ ހޯދައި، މިހާތަނަށް މުބާރާތުގައި ދެމި ހުރި ހަމައެކަނި އަންހެން ބައިވެރިޔާ ކަމަށްވާ ހުޅުދު އަށް ނިސްބަތްވާ އައިޝަތު ޖައިޝާ ވަހީދު ގަދަ އަށެކާ ހަމައިން ރޭ މުބާރާތުން ކަޓައިފި އެވެ.
ޓީވީއެމުން ހަފުތާ ބަންދުގައި ގެނެސްދޭ މި ޝޯ އިން ޖައިޝާ ވަކިވުން ވެގެން ދިޔައީ، އައިޑޮލްގެ އަންހެން ބައިވެރިންގެ ދަތުރު އެއްކޮށް ނިމުމަކަށް އައުމެވެ.
ރޭގެ ޝޯގައި ޑަބަލް އެލިމިނޭޝަނެއް، ފުރަތަމަ ފަހަރަށް ކުރިއަށް ގެންދިޔަ އިރު، ޖައިޝާއާ އެކު، ދެން މުބާރާތުން ކެޓީ ފުވައްމުލަކު އަހުމަދު ފަރަޝް އެވެ.
ޖައިޝާ އާއި ފަރަޝްއާ އެކު ރޭ އެންމެ ދަށްކޮށް ވޯޓް ލިބިގެން، ބޮޓަމް ތުރީ އަށް އިބްރާހީމް ވަހީދު (ބޮޑުބެ) ވެސް ދިޔަ އެވެ. އެކަމަކު އޭނާ ސަލާމަތްވެ، ގަދަ ހަޔަކުން ޖާގަ ވަނީ ކަށަވަރުވެފަ އެވެ.
މޯލްޑިވިއަން އައިޑޮލް 2 ގެ ގަދަ ހައެއް:
- މުހައްމަދު ތަސްނީމް (ބޮބް)
- އިބްރާހީމް ވަހީދު (ބޮޑުބެ)
- ޝަމްވީލް މުހައްމަދު (ބޮރޯ)
- ހަމޫދު އަހުމަދު (އަލްވިން)
- އަހުމަދު ނަބީލް މުހައްމަދު
- އަބްދުﷲ ހިޝާން
ޖައިޝާގެ އައިޑޮލް ދަތުރު ރޭ ނިމުމަކަށް އައިސް އެތައް، މި ޝޯގެ އެތައް އަންހެން ފޭނުންނަކަށް މާޔޫސްކަން ލިބިގެން ދިޔަ އިރު، ފާހަގަކޮށްލެވޭ ކަމަކީ މޯލްޑިވިއަން އައިޑޮލް ސީޒަން އެކެއް ކާމިޔާބު ކުރީ މިދިޔަ އަހަރު އަންހެން ބައިވެރިއެއް ކަމެވެ.
އެއީ ލައިޝާ ޖުނައިދު (ލައި) އެވެ.