ހަންކެޑެ އާއި ގައުކެނޑި ދޭތެރޭ އޮންނަ ކޯޒްވޭގެ ފެންސް ހަރު ކުރުމުގެ މަސައްކަތް އެންމެ ފަހުން ބަޔަކާ ހަވާލުކޮށްފި އެވެ.
އެ މަސައްކަތް ހަވާލުކޮށްފައި ވަނީ ހިތަދޫ ސަން ޝެލް ޕްރައިވެޓް ލިމިޓެޑާ އެވެ. އެކަމުގެ އެއްބަސްވުމުގައި އައްޑޫ ސިޓީ ކައުންސިލާއި ސަން ޝެލްއާ ދެމެދު މިއަދު ވަނީ އެއްބަސްވުމުގައި ސޮއިކޮށްފަ އެވެ.
އެއްބަސްވުމުގައި ކައުންސިލްގެ ފަރާތުން ސޮއި ކުރެއްވީ މޭޔަރު އަބްދުﷲ ސޯދިގް (ސޯބެ) އާއި ޑެޕިއުޓީ މޭޔަރު އަބްދުﷲ ތައްޔިބް (ޓޮމް) އެވެ.
ގައުކެނޑި ކޯޒްވޭގެ ފެންސް ހަލާކުވެފައިވާ ހުންނަތާ މިހާރު މިއީ އަށް ވަނަ އަހަރެވެ.
ކޯޒްވޭގެ އެއް ފަޅީގެ ފެންސް އެންމެ ބޮޑަށް ހަލާކުވީ ޑިސެމްބަރު 22، 2009 ގައި ކޯޒްވޭ މަތީގައި ހިނގި ނުރައްކާތެރި އެކްސިޑެންޓެއްގަ އެވެ.
އެ ހާދިސާ ހިނގީ ބާރު ސްޕީޑްގައި ދުއްވި ކާރަކާއި ސައިކަލެއް ކޮންޓްރޯލް ނުވެ ގޮސް، ފެންސްގައި ޖެހި ބޮޑެތި ގެއްލުންތަކެއްވި އެވެ. މި ހާދިސާގައި 3 މީހަކު ވަނީ ނިޔާވެފައެވެ. އެއީ ކާރު ދުއްވަން އިން މީހާ އާއި ސައިކަލްގެ ގައި ތިބި ދެމީހުންނެވެ.
ގައުކެނޑި ކޯޒްވޭގެ ފެންސް މަރާމާތު ކުރާނެ ބަޔަކު އައްޑޫ ސިޓީ ކައުންސިލުން ހޯދަން ފަށާފައި ވަނީ ކައުންސިލްގެ ފުރަތަމަ ދައުރުން ފެށިގެންނެވެ.