ޑޭވިޑް ދަވަން ޑައިރެކްޓް ކުރާ ރޮމޭންޓިކް ކޮމެޑީ "ޖުޅްވާ 2" ގެ ޝޫޓިން އަށް ފިލްމުގެ ކާސްޓާއި ކްރޫ ލަންޑަނަށް ހިނގައްޖެ އެވެ.
މި ފިލްމަކީ ސާޖިދް ނަދިއަދްވާލާ ޕްރޮޑިއުސްކޮށް، ޑޭވިޑް 1997 ގައި ގެނެސް ދިން ފިލްމް "ޖުޅުވާ" ގެ ދެވަނަ ބައެއްގެ ގޮތުގައި އުފައްދާ ފިލްމެކެވެ.
އެކަމަކު ކުރީ ފިލްމާ ހިލާފަށް މި ފަހަރުގެ ފިލްމުގެ ލީޑް ރޯލުން ފެނިގެން ދާނީ ޑޭވިޑްގެ ދަރިފުޅު ވަރުން ދަވަން އާއި ޖެކޮލިން ފެނާންޑޭޒްގެ އިތުރުން، ތާޕްސީ ޕަންނޫ އެވެ.
މި ފިލްމްވެގެން ދާނީ 2013 ގައި ރިލީޒްވި "މޭ ތޭރާ ހީރޯ" އަށް ފަހު، ބައްޕަގެ ފިލްމެއްގައި ވަރުން މަސައްކަތް ކުރާ ފުރަތަމަ ފިލްމަށެވެ.
މިއީ "ޖުޅްވާ 2" އަކީ މިދިޔަ އަހަރު ރިލީޒް ކުރި "ޑިޝޫމް" އަށް ފަހު ވަރުން އާއި ޖެކޮލިން އެކުގައި ކުޅޭ ދެވަނަ ފިލްމެވެ. މިއީ ވަރުންއާ އެކު ތާޕްސީ މަސައްކަތް ކުރާ ފުރަތަމަ ފަހަރެވެ.
ސަލްމާން ހާން ޑަަބަލް ރޯލަކުން ފެނިގެން ދިޔަ "ޖުޅްވާ" އާ އެއްގޮތަށް މީގެ ދެވަނަ ބައިން ވަރުން ވެސް ފެނިގެން ދާނީ ޑަބަލް ރޯލަކުންނެވެ.
ރިޕޯޓްތައް ބުނާ ގޮތުން "ޖުޅްވާ" ގެ ހާއްސަ ފެނިލުމަކުން ސަލްމާން ހާނާއި ކަރިޝްމާ ކަޕޫރު ވެސް ފެނިގެން ދާނެ އެވެ.
"ޖުޅްވާ" ގައި ސަލްމާނާ އެކު ބަތަލާއިންގެ ރޯލް ކުޅުނީ ކަރިޝްމާ އާއި ރާމްބާ އެވެ.
"ޖުޅްވާ 2" ސިނަމާތަކަށް އަންނާނީ އަންނަ ސެޕްޓެމްބަރު މަހުގެ 29 ގަ އެވެ.