ބޮލީވުޑްގެ ކުރީގެ މަޝްހޫރު ބަތަލާ އާޝާ ޕަރޭކްގެ ބައޮގްރަފީ "ހިޓް ގާލް" ނެރެފި އެވެ.
އެ ފޮތް ނެރެން މުމްބާއީގައި އިއްޔެ ބޭއްވި ކުލަ ގަދަ ރަސްމިއްޔާތުގައި "ހިޓް ގާލް" ރަސްމީކޮށް، ނެރެ ދިނީ މަޝްހޫރު އެކްޓަރު ސަލްމާން ހާނެވެ. އޭނާ ވަނީ އާޝާގެ ބައޮގްރަފީއާ ބެހޭ ގޮތުން ކުރު ބަޔާނެއް ވެސް ފޮތުގައި ލިޔެފަ އެވެ.
"ހިޓް ގާލް" ނެރެން ބޭއްވި ހަފުލާގައި މަޝްހޫރު ގިނަ ތަރިން ވެސް ބައިވެރިވި އެވެ. އޭގެ ތެރޭގައި ދަރްމެންދްރާ، ޖީތެންދްރާ، ވަހީދާ ރަހްމާން، ހެލެން، ޖެކީ ޝްރޮފް އަދި އަރޫނާ އިރާނީ ފަދަ ސެލެބްރިޓީން ހިމެނެ އެވެ.
އާޝާ، 74، ގެ ބައޮގްރަފީ ލިޔުނީ މަޝްހޫރު ލިޔުންތެރިޔާ އަދި ޑައިރެކްޓަރު ހާލިދު މުހައްމަދެވެ.
މި ފޮތުގައި ވަނީ އާޝާގެ އަމިއްލަ ހަޔާތާއި ފިލްމީ ކެރިއަރުގައި ކުރިމަތިލާން ޖެހުނު އަޑިގުޑަންތަކާއި ކާމިޔާބީގެ ވާހަކަތައް ވަރަށް ތަފުސީލްކޮށް ކިޔައި ދީފަ އެވެ.
އޭނާއަކީ 1960 އާއި 1970 ގެ އަހަރުތަކާ ހަމައަށް ބޮލީވުޑްގައި މަސައްކަތް ކުރި އެންމެ ރީތި އަދި އެންމެ ކާމިޔާބު އެއް ބަތަލާ އެވެ.
އެ ދުވަސްވަރު ބައެއް ޑައިރެކްޓަރުންނާއި ޕްރޮޑިއުސަރުން ގަބޫލު ކުރި ގޮތުގައި ފިލްމެއްގެ ބަތަލާއަކަށް، އާޝާ ލައިފި ނަމަ، އެ ފިލްމް ބޮޑު ހިޓަކަށް ވާނެ އެވެ. އޭނާ ވަނީ ވަރަށް ކާމިޔާބު ގިނަ ފިލްމުތަކެއް ކުޅެފަ އެވެ.
އެކްޓް ކުރުމާ ދުރުވި ފަހުން އާޝާ ވަނީ އިންޑިއާގެ ސެންސަރު ބޯޑްގައި ވެސް މަސައްކަތްކޮށްފަ އެވެ.
އޭނާ ކުޅެފައިވާ ފާހަގަކޮށްލެވޭ ބައެއް ފިލްމުތަކުގެ ތެރޭގައި ކަޓީ ޕަޓަންގް (1970)، ތީސްރީ މަންޒިލް (1966) އަދި ދިލް ދެކެ ދޭކޯ (1959) ފަދަ އެތައް ފިލްމެއް ހިމެނެ އެވެ.