ކުކުޅު މަހަކީ ދިވެހިންގެ ކެއުމުގެ ތެރޭގައި ވެސް ވަރަށް އާންމުކޮށް ބޭނުން ކުރާ މަހެކެވެ. ގިނަ ބަޔަކަށް ވަރަށް މީރު އެއްގަމު މަހެއް ވެސް މެ އެވެ.
އެގޮތުން ކުކުޅު ރިހަ އާއި ރޯސްޓް ކުރި ކުކުޅާއި ބާބަކިއު ހަދައިގެން ވެސް ކުކުޅު މަސް ކެއުމަކީ ވަރަށް އާންމު ކަމެކެވެ.
އެކަމަކު ސިއްހީ ތަޖުރިބާރުންދޭ ވަރަށް ބޮޑު އިރުޝާދެއް މިހާރު އެބަ އޮތެވެ.
އެއީ ކުކުޅު މަސް ކާ ނަމަ ރަނގަޅަަށް ކައްކައިގެން ކާށޭ އެވެ.
މާނައަކީ ކުކުޅު މަސް ކާންވާނީ ރަނގަޅަށް ރޯފިލުވައިގެންނޭ އެވެ.
އެކަން އެގޮތަށް ނުކުރާ ނަމަ، ކުކުޅުގައި ހިމެނޭ ނުރައްކާތެރި ބެކްޓީރިއާތަކެއްގެ ސަބަބުން ވާގި ނެތުން ފަދަ ނުރައްކާތެރި ބައްޔަކާ ކުރިމަތިލާން ޖެހި ދާނެ އެވެ. އެހެން ގޮތަކަށް ބުނާ ނަމަ މީގެ ސަބަބުން ގްލައިން ބެއާ ސިންޑްރޯމް (ޖީބީއެސް) ގެ ޝިކާރަކަށް ވެދާނެ އެވެ.
ސިއްހީ ތަޖުރިބާކާރުން ބުނަނީ ކުކުޅު މަސް ރަނގަޅަށް ރޯ ފިލަންދެން ކައްކަން ޖެހޭ ހޫނު މިނުގައި ނުކައްކާ ނަމަ، މަހުގެ އެތެރޭގައި ހުންނަ ބެކްޓީރީތައް މަރު ނުވެ ހުންނަ ކަމަށެވެ.
އެހެންވެ މީގައި މުހިއްމީ ރަނގަޅަށް ރޯ ފިލަންދަން ކެއްކުމެވެ.
އެމެރިކާގެ މިޝިގަން ޔުނިވަސިޓީގެ ވެޓިރިނަރީ މެޑިސިން ކޮލެޖްގެ ރިސާޗަރު ލިންޑާ މަންސްފީޑް ވިދާޅުވި ގޮތުގައި ކުކުޅު މަސް ރަނގަޅަށް ނުކައްކައި ކާ ނަމަ، ކުރިމަތި ވެދާނެ އެންމެ ބޮޑު ނުރައްކަލަކީ މީހާ ޕެރަލައިޒްވުމެވެ. ނުވަތަ ހަށިގަނޑުން ވާގި ނެތުމެވެ.
އެހެންވެ ކެއުމުގެ ވައްޓަފާޅިގެ ތެރޭގައި ރަނގަޅު އާދަތައް އަދި ސިއްހީ ތަޖުރިބާކާރުން ދޭ އިރުޝާދުތަކުގެ ބޭނުން އެންމެން ވެސް ބޭނުން ހިފަން ވާނެ އެވެ.