މުޅި އިންޑިއާ އެ ފިލްމަކަށް ކެތްތެރިކަމެއް ނެތި އިންތިޒާރު ކުރަމުން އަންނަ "ބާހްބަލީ: ދަ ކޮންކްލޫޝަން" މި ފިލްމުގެ ފުރަތަމަ ބަޔަށް ވުރެ ހުރިހާ ގޮތަކުން ވެސް މާ ބޮޑަށް ވަރުގަދާނެ ކަމަށް ޑައިރެކްޓަރު އެސްއެސް ރާޖަމޯލީ ބުނެފި އެވެ.
އިންޑިއާގެ ބޮކްސް އޮފީހުގައި ވެސް މުޅިން އާ ރެކޯޑްތަކެއް މުގުރާނެ ކަމަށް ބެލެވޭ "ބާހްބަލީ 2" ސިނަމާތަކަށް އަންނާނީ މި މަހުގެ 28 ގަ އެވެ.
ރާޖަމޯލީ ބުނީ މި ފަހަރުގެ ފިލްމުގައި ޑްރާމާ ވަރުގަދަވެފައި، މުޅި ފިލްމް ފެންނަ ގޮތް މާ ބޮޑަށް ވެސް ބިޔަވާނެ ކަމަށެވެ.
އޭނާ ބުނީ ބާހްބަލީގެ ދުނިޔެ މި ފަހަރު މާ ބޮޑަށް ވެސް ފުރިހަމަކޮށް ފެންނާނެ ކަމަށެވެ.
މި ފިލްމުގައި ދައްކުވައިދޭ ހަނގުރާމަތީ މަންޒަރުތައް ވެސް ކުރީ ފިލްމަށް ވުރެ، ހުރިހާ ގޮތަކުން ވެސް ފުރިހަމަވެފައި މޮޅުވާނެ ކަމަށް ޑައިރެކްޓަރު ބުންޏެވެ.
"އަހަރެން ނުބުނާނަން މީ ސީކްއެލްކޭ. ފުރަތަމަ ފިލްމުން މުޅި ވާހަކަ ގެނެސް ނުދެވޭތީ ދެ ފިލްމެއްގެ ގޮތުގައި ބާހްބަލީ ސްކްރީނަށް މި އަންނަނީ. އެހެންވީމާ މިއީ ކުރީގެ ފިލްމް ނިމުނު ހިސާބުން ހަމަ މީގެ ވާހަކަ ފޮލޯ ކުރާ ކުރާ ގޮތް ދައްކުވައިދޭ ފިލްމެއް ބާހްބަލީ ދޭކަކީ،" އިންޑިއާގައި މިހާރު ހުރި އެންމެ މޮޅު ޑައިރެކްޓަރުންގެ ތެރޭގައި ހިމެނޭ ރާޖަމޯލީ ބުންޏެވެ.
"ބާހްބަލީ" ގެ ކާސްޓުންގެ ތެރޭގައި ޕްރަބާސް، ތަމަންނާ ބާޓިއާ، ރާނާ ދަގޫޕަތީ، އަނުޝްކާ ޝެޓީ އަދި ރާމިއާ ފަދަ ތަރިންހިމެނެ އެވެ.
މި ފިލްމުގެ އަސްލަކީ ތެލެގޫ ކަމަށް ވިޔަސް އިންޑިއާގައި ވާހަކަ ދައްކާ ވަރަށް ގިނަ ބަހަކުން ޑަބްކޮށްގެން ފިލްމް ރިލީޒް ކުރާނެ އެވެ.
"ބާހްބަލީ 2" ގެ ހިންދީ ވާޝަން ގެނެސް ދެނީ ކަރަން ޖޯހަރްގެ ދަރްމާ ޕްރޮޑަކްޝަނުންނެވެ.