ރާއްޖޭގެ ސިޔާސީ މައިދާނުގައި ހަރަކާތްތެރިވާ އަންހެނުންގެ ތެރެއިން ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް (ރޮޒޭ) އަކީ އެންމެ އަޑު ގަދަ އެއް މެމްބަރަށް ވާނެ އެވެ.
އޭނާއަކީ މަޖިލީހުގެ ތަޅުމުގަ އާއި ސިޔާސީ ޕޯޑިއަމްތަކާއި ޓީވީ ޕްރޮގްރާމްތަކުގައި ވެސް ވަރަށް އަޑު ހަރުކޮށް ސަރުކާރަށް ވަރަށް ބޮޑަށް ފާޑު ވިދާޅުވަމުން ގެންދަވާ ބޭފުޅެކެވެ. ހާއްސަކޮށް އިދިކޮޅު އެމްޑީޕީ އަށް ވަން ފަހުން ރޮޒޭގެ އަޑުގެ ވަކިން ގަދަ އެވެ.
ސަރުކާރަށް ފާޑު ކިޔަންވެއްޖެ ނަމަ، ރޮޒޭ އަށް ވުރެ ވަކި ރަނގަޅަށް، ވަކިން ވަރުގަދަ އަށް އެކަން ކުރެވޭ އަންހެން ކަނބަލުން ސިޔާސީ މައިދާނުން ފެންނަލެއް އަދިވެސް ތަންކޮޅެއް މަދޭ ބުނެވި ދާނެ އެވެ.
މަގުމަތީގެ ހަރަކާތްތަކާއި ރަށްރަށަށް އެމްޑީޕީން ކުރާ ދަތުރުތަކުގައި ވެސް ރޮޒޭއަކީ އެންމެ ގަދަ އެއް އަޑެވެ. އޭނާގެ ބައިވެރިވުން މިހާތަނަށް އޮތީ އެންމެ ކުރީ ސަފުން ފެނިގެން ގޮސްފަ އެވެ.
އެކަމަކު މި ފަހަކަށް އައިސް ސިޔާސީ ހަރަކާތްތަކުން ރޮޒޭ ފެނުން މަދުވެއްޖެ އެވެ.
މަޖިލީހުގެ ތެރޭގައި ވެސް ކުރިން ރޮޒޭގެ އަޑު އިވޭ ވަރަކަށް މިހާރަކު ނީވެއޭ ބުނެވިދާނެ އެވެ.
އަނެއްކޮޅުން ވެރިކަމުގައި އޮތް ޕީޕީއެމާ ދެކޮޅަށް، ރާއްޖޭގެ ބޮޑެތި ހުރިހާ ޕާޓީތައް އެއްގަލަށް އަރައި، އެކައްޗެއް ކިޔައިގެން ނިކުމެ އިޭ އިރު، މި ހަރަކާތުގެ ތެރެއިން ވެސް އެއްގޮތަކަށް ވެސް ރޮޒޭއެއް ނުފެނެ އެވެ.
ސަބަބެއް ނޭނގެ އެވެ. ޔަގީންވާ ކަމަކީ އޭނާގެ ސިޔާސީ ހަރަކާތްތައް ކުރިއަށް ވުރެ މިހާރު ފަނޑު ކަމެވެ.
އެމްޑީޕީއާއި ޖުމްހޫރީ ޕާޓީ އާއި ޕީޕީއެމްގެ ރައީސް މައުމޫން އަބްދުލް ގައްޔޫމްގެ ފެކްޝަަނުން ސަރުކާރަށް ދެކޮޅަަށް މިހާރު ކޮންމެ ރެއަކުން ޖަލްސާތައް، ބާއްވައި، ބައެއް ހާލަތްތަކުގައި މަގުމަތީގެ ހަރަކާތްތަކަށް ނިކުންނަ އިރު ވެސް ރޮޒޭގެ ހިލަމެއް މިހާރަކު ނުވެ އެވެ.
ސިޔާސީ ޕޯޑިއަމްތަކުގައި އޭނާ ނެގި ފޯރި އާއި ޖޯޝް، ގައުމު މިހާރު އޮތް ހާލަތުގައި ނުފެންނާތީ މިކަމާ ވަރަށް ގިނަ ބަޔަކު އަންނަނީ ސުވާލު ވެސް އުފައްދަމުންނެވެ.
ޔަގީނުން ވެސް ޕޯޑިއަމްތަކުގައި ސަރުކާރަށް ރޮޒޭ ބަވާ ބެވުންތައް، މިހާރު ނުފެންނާތީ އެއީ ބައެއް މީހުންނަށް ފޫހި ކަމަކަށް ވެސް ވެދާނެ އެވެ.
އެހެންވެ ރޮޒޭ އަށް ވެގެން އުޅޭ ގޮތެއް ބަލާލުމުގެ ޝައުގުވެރިކަން ވެސް މިހާރު ބޮޑެވެ.
ހާއްސަކޮށް އޭނާ ތަމްސީލް ކުރާ ދާއިރާގެ ރައްޔިތުން ވެސް ރޮޒޭގެ މިހާރުގެ ހަނު ހުރުމާ މެދު ގައިމު ވެސް ސުވާލު އުފައްދާނެ އެވެ.
ރޮޒޭ ނިކަން މި ސުވާލުތަކަށް ޖަވާބު ދީބަލާށެވެ. ވެގެން އުޅެނީ ކިހިނެއް ހެއްޔެވެ؟