ކުދި ވިޔަފާރިތަކުން ދައްކަން ޖެހޭ ޓެކްސްއާ ގުޅޭ ހުރިހާ ޖޫރިމަނާތައް މައާފުކޮށް ދޭ ގޮތަށް މޯލްޑިވްސް އިންލަންޑް ރެވެނިއު އޮތޯރިޓީ (މިރާ) އިން ހަމަޖައްސަ އިފިއެވެ.
މީރާއިން ބުނީ މިއީ މީރާއިން ޖޫރިމަނާ މަޢާފު ކުރުމުގައި މިހާރު ޢަމަލު ކުރަމުންދާ ޢާއްމު އުސޫލުގެ އިތުރުން، ކުދި ވިޔަފާރިތަކަށް ދެވޭ ޚާއްޞަ ޢިނާޔަތެއް ކަމަށެވެ.
އެގޮތުން އަދި އެފަދަ ފަރާތްތައް މި ނިޒާމުގެ ތެރެއަށް އެނބުރި އައުމަށްޓަކައި އެހީތެރިވެ ދިނުމުގެ ގޮތުން އަންނަ ޖޫން މަހުގެ ތިރީހުގެ ނިޔަލަށް ދެވޭ ފުރުޞަތެއް ކަމަށް ވެސް މީރާ އިން ބުންޏެވެ.
މި އުސޫލުގެ ދަށުން މަޢާފުކޮށް ދެވޭނީ، އަހަރަކު 10 މިލިއަން ރުފިޔާ އަށް ވުރެ މަދުން އާމްދަނީ ލިބޭ ފަރާތްތަކުން، ބިޒްނަސް ޕްރޮފިޓް ޓެކްސް، ބީޕީޓީ އަދި މުދަލާއި ޚިދުމަތުގެ އަގުން ނެގޭ ޓެކްސް، ޖީއެސްޓީ އާ ގުޅިގެން މި މަހުގެ ނިޔަލަށް އަދާ ކުރަން ޖެހޭ އެންމެހާ އިލްތިޒާމުތަކާ ގުޅޭ ޖޫރިމަނާތައް ލުއިކޮށް ދިނުމަށް އެދި، ކަނޑައެޅިފައިވާ މުއްދަތުގައި އެ އޮތޯރިޓީ އަށް ހުށައެޅުމުން ކަމަށް މީރާ އިން ބުންޏެވެ.
ކުދި ވިޔަފާރިތަކަށް ހާއްސަކޮށްގެން މި އަހަރުގެ ތެރޭގައި މީރާއިން ވަނީ ގިނަ ލުއިތަކެއް ދީފަ އެވެ.
އޭގެ ތެރޭގައި އަމިއްލަ ފަރުދުން އަދި ޑީމްޑް ޕާރޓްނަޝިޕްތަކުން އެ އޮތޯރިޓީގައި ރަޖިސްޓަރީ ކުރުމުގައި ބަލާ އާމްދަނީގެ ޝަރުތު، އެވްރެޖްކޮށް މަހަކަށް 40،000ރ. އަށް އިތުރު ކުރުމާއި، އެ ފަދަ ފަރާތްތަކުން، އަހަރެއްގެ ތެރޭގައި އެއް މިލިއަން ރުފިޔާ އަށް ވުރެ މަދުން އާމްދަނީ ލިބޭނަމަ ނުވަތަ ޓެކްސް ބިނާ ކުރެވޭ ފައިދާ 500،000ރ. އަށްވުރެ އިތުރު ނުވާ ނަމަ، ބީޕީޓީ ބަޔާން ހުށަހަޅަން ނުޖެހޭ ގޮތަށް ހަމަޖެއްސުން ވެސް ހިމެނެ އެވެ.
މީގެ އިތުރުން ކުދި ވިޔަފާރިތަކުން، ހިސާބުތައް ބެލެހެއްޓުމުގައި "ކޭޝް ބޭސިސް" އިޚުތިޔާރު ކުރުމުގެ ފުރުޞަތު ދިނުމާއި، އެ އޮތޯރިޓީ އަށް އޮޑިޓް ރިޕޯޓް ހުށަހަޅަން ނުޖެހޭ ގޮތަށް ހަމަޖެއްސުން ފަދަ ލުއިތައް ވެސް ހިމެނެ އެވެ.