އާމިރް ހާން ރެސްލިން ތަޅާ މީހެއްގެ ރޯލުން ފެނިގެން ދިޔަ ކާމިޔާބު ފިލްމް "ޑަންގަލް" އަވަށްޓެރި ޗައިނާގައި ރިލީޒް ކުރަން ނިންމައިފި އެވެ.
ޗައިނާ ބަހުން ޑަބްކޮށްގެން މި ފިލްމް އެ ގައުމުގައި އަޅުވާނީ އަންނަ މަހުގެ 5 ގަ އެވެ.
"ޑަންގަލް" ޗައިނާގައި ޕްރޮމޯޓް ކުރުމަށްޓަކައި އާމިރާއި އެ ފިލްމުގެ ޑައިރެކްޓަރު ނިތޭޝް ތިވާރީ ރޭ ވަނީ ޗައިނާ އަށް ގޮސްފަ އެވެ.
މި އަހަރުގެ ގިނަ އެވޯޑްތަކުގައި މުހިއްމު އެވޯޑްތަކެއް އުފުލާލައިފައިވާ "ޑަންގަލް" ވަނީ ބޮކްސް އޮފީހުގައި 300 ކްރޯޑް ރުޕީސް އަށް ވުރެ ބޮޑު އާމްދަނީއެއް ހޯދައިފަ އެވެ.
އާމިރަކީ ޗައިނާގައި ވަރަށް ގިނަ ފޭނުން ތިބި އެކްޓަރަކަށްވުމާ އެކު، މި ފަހުން ރިލީޒްވި އޭނާގެ ކޮންމެ ފިލްމެއް ޗައިނާގައި ދައްކަ އެވެ.
އެގޮތުން "ޕީކޭ"، "ދޫމް 3" އަދި "3 އިޑިއަޓްސް" ވެސް އެ ގައުމުގައި ކާމިޔާބު ޝޯތަކެއް ދައްކައިފަ އެވެ.
އާމިރް ދެން އެންމެ އަވަހަށް ފެނިގެން ދާނީ މި އަހަރުގެ ފަހުކޮޅު ރިލީޒް ކުރާ "ސީކްރެޓް ސްޕަސްޓާ" އިންނެވެ.