މިހާރަކަށް ޑިޕްރެޝަން ނުވަތަ ސަފުސާނީ ބަލިމަޑުކަމުގެ ވާހަކަތައް އަންނަނީ ވަރަށް ދެކެވެމުންނެވެ. ދިރިއުޅުގައި ކުރިމަތިވާ އެކި ކަހަލަ މައްސަލަތަލާ ހެދި ފަހަކަށް އައިސް ވަރަށް ގިނަ ޒުވާނުން އަންނަނީ އަމިއްލަ އަށް މަރުވެސް ވަމުންނެވެ.
މިއީ ޑިޕްރެޝަނުގެ އެންމެ ނުރައްކާ ހިސާބެވެ. ދިރިއުޅުމާ ދޭތެރޭ މާޔޫސްވެ، އުންމީދު ކެނޑި އަދި އަމިއްލަ ނަފުސަށް އިތުބާރު ނުކުރެވޭ ހިސާބަށް ދިއުމަކީ ހަމަ ހަގީގަތުގައި ވެސް ސީރިއަސް މައްސަލައެކެވެ. އެހެންވެ މި ވާހަކަތައް ދައްކަން ޖެހެ އެވެ.
ފަހުގެ ދިރާސާއަކުން ދައްކާފައިވާ ގޮތުގައި ޑިޕްރެޝަނާ ދެކޮޅަށް ހަނގުރާމަކޮށް، ކާމިޔާބު ވެސް ހޯދި ދާނެ އެވެ.
އޭގެ ތެރެއިން އެއްގޮތަކީ ދިރިއުޅުމުގެ އާދަތަކަށް ކޮންމެވެސް ވަރެއްގެ ބަދަލެއް ގެނައުމެވެ.
އިންޑިއާގެ ސެންޓްރަލް ފުޑް ޓެކްނޮލިޖިކަލް ރިސާޗް އިންސްޓިޓިއުޓްގެ ޑައިރެކްޓަރު ޕްރޮފެސަރު ރާމް ރަޖޭސްކަރަން ވިދާޅުވި ގޮތުގައި ޑިޕްރެޝަނާ ހަނގުރާމަ ކުރުމުގައި އޮމެގާ-3 އެކުލެވޭ ބާވަތްތައް ބޭނުން ކުރެވިދާނެ އެވެ.
އެގޮތުން އޭނާ ލަފާ ދެއްވާ ގޮތުގައި ޗިއާ ސީޑްސް ނުވަތަ ޗިއާ އޮށް (އިސްބަގޫލް) ބޭނުން ކުރުމަކީ ޑިޕްރެޝަނާ ދެކޮޅަށް އެޅިދާނެ ފިޔަވަޅެކެވެ.
މި އޮށަކީ އޮމެގާ-3ގެ މާއްދާތަކުން މުއްސަނދިވެފައިވާ އެއްޗެކެވެ. އެހެންވެ އާދަކޮށް ކޮންމެ ދުވަހަކު ޗިއާ ފެން ތައްޓެއް ބޯ ނަމަ، ޑިޕްރެޝަނާ ދުރުކޮށް ދޭނެ އެވެ.
ދެން އިފެދޭ ސުވާލަކީ ޗިއާ އޮށް ބޭނުން ކުރާނީ ކިހިނެއްތޯ އެވެ؟ ވަރަށް ފަސޭހަ އެވެ. ފެން ތައްޓެއްގެ ތެރެއަށް ތިން ގްރާމްގގެ ޗިއާ އޮށް އަޅާފައި 10 ވަރަކަށް މިނިޓް ވަންދެން ބަހައްޓާށެވެ. އޭގެ ތާސީރު ފެންތަށީގެ ތެރެއަށް ދިއުން ބޯލާނީ އެވެ.
މި އާދަ ކޮންމެ ދުވަހަކު ހަރުލައްވައިފި ނަމަ، މާޔޫސްތަކާ ދުރުކޮށްދީ، ކަންކަމާ ދޭތެރޭ ރަނގަޅު ނަޒަރަކުން ވިސްނައި، މީހާގެ މޫޑް ބަރާބަރުކޮށް ދޭނެ ކަމަށް ރާމް ވިދާޅުވި އެވެ.
އޭނާ ވިދާޅުވީ ތަފާތު މޭވާތަކުން ޖޫހާއި ސްމޫތީ ފަދަ ބުއިންތައް ވެސް ތައްޔާރުކޮށް ކުރުމުގެ އިތުރަށް ބަނަހާއި ޕާން އަދި ކޭކް ފަދަ ކާ ތަކެތި ތައްޔާރު ކުރާ އިރު، އޭގެ ތެރެއަށް ޗިއާ އޮށް އޮޅައިގެން ބޭނުން ކުރުމަކީ ކުރެވިދާނެ ކަމެއް ކަމަށެވެ.
ޗިއާ އޮށް ރާއްޖޭގެ ބާޒާރުން ވެސް މިހާރު ލިބެން ހުންނާނެ އެވެ. އެހެންވެ ތަޖުރިބާކޮށްލަން މިހާރު އެހާ އުނދަގޫ ކަމަކަށް ގައިމު ވެސް ނުވާނެ އެވެ.
ހާއްސަކޮށް ޑިޕްރެޝަނާ ކުރިމަތިލާން ޖެހިފައިވާ މީހުން މިކަމާ ދޭތެރޭ ސީރިއަސްކޮށް ވިސްނައިލާށެވެ.