ނިދި މަދުވުމުން ކަށިތައް ފީވޭ: ދިރާސާ

ދިގުމުއްދަތަކަށް ފުރިހަމަ ނިދި ނުލިބުމަކީ ކަށި ފީވާ ކަމެއް ކަމަށް ޔުނިވާސިޓީ އޮފް ކޮލޮރޭޑޯ އިން ދާދިފަހުން ކުރި ދިރާސާއަކުން ދައްކައިފި އެވެ.

އެ ދިރާސާގައި ބައިވެރިވި ފަރާތްތައް ތިން ހަފްތާ ވަންދެން ނިދީ ފާއިތުވި ދުވަހަށްވުރެ ހަތަރު ގަޑިއިރު ލަހުންނެވެ. އެހެންކަމުން އެމީހުންގެ ދުވަސް 28 ގަޑިއިރަށް ދެމިގެން ދިޔައެވެ. ކޮންމެ 24 ގަޑިއިރަކު ފިރިހެނުންނަށް ގިނަ ވެގެން ނިދަން ދީފައި ވަނީ 5.6 ގަޑިއިރެވެ.

އެއީ ރޭގަނޑު ޝިފްޓް ގައި މަސައްކަތް ކުރާ މީހުންނަށް ކުރު ނިދި ލިބުމަކީ އާންމު ކަމަކަށް ވާތީއެވެ. ހޭލާ ތިބޭއިރު، އެ ހުރިހާ ފިރިހެނުންނެއް ވެސް ކެއީ އެއް މިންވަރަކަށް ކެލޮރީސް އާއި ނިއުޓްރިއެންޓް ހުންނަ ކާނާ އެވެ.

އެކްސްޕެރިމެންޓް ފެށި އިރާއި ތިން ހަފްތާ ފަހުން އެމީހުންގެ ލޭގެ ސާމްޕަލް ނެގުމަށްފަހު ޓެސްޓް ކުރެވުނެވެ.

އޭގެ ތެރެއިން ހަތް ފިރިހެނުންނަކީ 20 އަހަރާއި 27 އަހަރާއި ދެމެދުގެ މީހުންނެވެ. އަދި ހަތަރު ފިރިހެނުންނަކީ އުމުރުން 55 އަހަރާއި 65 އަހަރާއި ދެމެދުގެ މީހުންނެވެ.

ދިރާސާވެރިން ހޯދި ގޮތުގައި އެކްސްޕެރިމެންޓް ފެށި އިރާއި އަޅާބަލާއިރު، ތިން ހަފްތާ ފަހުން ދިރާސާގައި ބައިވެރިވި ފިރިހެނުންގެ ކަށި އުފައްދައިދޭ ޕީ1އެންޕީ ގެ ލެވެލްތައް ވަނީ ދަށްވެފައެވެ. އަދި ޕީ1އެންޕީ ގެ މިންވަރު މުސްކުޅި ފިރިހެނުންގެ ގައިގައި 18 އިންސައްތަ ދަށްވިއިރު، ޒުވާން އުމުރުފުރާގެ މީހުންގެ ގައިން ދަށްވެފައި ވަނީ 27 އިންސައްތަ އަށެވެ.

ކްރިސްޓީން ސްވޯންސަން ވިދާޅުވި ގޮތުގައި ޕީ1އެންޕީ ގެ މިންވަރު އެގޮތަށް ދަށްވުމަކީ ކަށިތައް ފީވެ އޮސްޓިއޯޕޯރެސިސް އާއި ކަށިތައް ފްރެކްޗާ ވުމަށް މަގުފަހިކޮށްދޭ ކަމެއް ކަމަށެވެ.