އާންމުންގެ މީގެ ހަތް އަހަރު ކުރިން ގައުކެނޑި ކޯޒްވޭ ސަރަހައްދުގައި ފުލުހުންނަށް ހާއްސަކޮށްގެން އައްޑޫ ސިޓީ ކައުންސިލުން ގާއިމު ކުރި ޗެކްޕޯސްޓް މަރާމާތުކޮށް، އަލުން ބޭނުން ކުރަން ނިންމައިފި އެވެ.
މިކަމާ ބެހޭ ގޮތުން ކައުންސިލާއި ފުލުުހުންނާ ދެމެދު މިހާރު މަޝްވަރާ ވެސް ކޮށްފަ އެވެ.
ގައުކެނޑި ކޯޒްވޭ ސަރަހައްދުގައި ޗެކްޕޯސްޓެއް ހެދީ އެ ސަރަހައްދަކީ ގިނަ ބަޔަކު އާންމުކޮށް ޕިކްނިކް ވެސް ދާ ދިމާލަކަސްވުމުގެ އިތުރުން އެއީ ހަންކެޑެ އާއި ގައުކެނޑި ކޯޒްވޭ ވެސް ގުޅޭ ސަރަހައްދަށްވުމާ އެކު އާންމުންގެ ސަލާމަތާއި ރައްކާތެރި ކަމަށް ހާއްސަކޮށްގެންނެވެ.
ކައުންސިލުން ބުނީ ފުލުހުންނާ އެކު ކުރެވުނު މަޝްވަރާތަކުގައި ކޯޒްވޭ މަރާމާތުކޮށް ބޭނުން ކުރުމުގައި ވަކިން ޚާއްސަކޮށް ރޯދަ މަހާއި ކައިރިކޮށް އެ ސަރަހައްދަށް ޕިކްނިކް ގޮސް އުޅުމުގައި ނުރައްކާތެރި ހާދިސާތައް މީގެ ކުރިން މެދުވެރިވެފައިވާތީ އެ ސަރަހައްދުގައި ފުލުހުންގެ ޗެކްޕޯސްޓެއް ހުރުމުގެ މުހިއްމުކަން ބޮޑު ކަމަށެވެ.
އެހެންވެ އެތަން ބޭނުން ކުރަން ވީހާ ވެސް އަވަހަކަށް ފެށުމަށް ވަނީ ނިންމައިފަ އެވެ.
އެތަން މިހާރު ހުރީ ވަރަށް ބޮޑަށް ވީރާނާވެފަ އެވެ. ގައުކެނޑި ޗެކްޕޯސްޓް ހެދީ 2010 ގަ އެވެ.
ޗެކްޕޯސްޓް އަލުން ބޭނުން ކުރަން ނިންމި އިރު، ހަންކެޑެ އާއި ގައުކެނޑި ގުޅޭ ކޯޒްވޭގެ ހަލާކުވެފައިވާ ފެންސް މަރާމާތު ކުރުމުގެ މަސައްކަތް ވެސް މިހާރު ވަނީ ފަށައިފަ އެވެ.