އައްޑޫ ސިޓީ ކައުންސިލްގެ ހިތަދޫ ދެކުނު ދާއިރާގެ ކައުންސިލަރ ކަމަށް ކުރިމަތިލާފައިވާ ޕީޕީއެމްގެ ކެންޑިޑޭޓް ޙަސަން ނަޢީމު އަށް ޕާޓީގެ ފަރާތުން އެހީތެރިކަން ނުލިބޭތީ އެކަމާއި އޭނާ ކަންބޮޑުވުން ފާޅުކޮށްފިއެވެއެވެ.
"އައްޑޫ ލައިވް" އަށް ނައީމް ބުނީ ހިތަދޫ ދެކުނު ދާއިރާގެ ޕީޕީއެމް ގޮފި ހިންގެވުމުގައި އިސްކޮށް ތިބި މީހުންގެ އެހީތެރިކަމެއް އަދި ޕާޓީގެ ފަރާތުން އައްޑޫއަށް ކަނޑައަޅާފައިވާ ސްޓިއަރިން ކޮމިޓީގެ އެހީތެރިކަމެއް ވެސް ނުލިބޭ ކަމަށެވެ.
ޙަސަން ބުނި ގޮތުގައި ސްޓިއަރިން ކޮމިޓީގެ އިސް ބޭބޭފުޅުންނަށް މެސެޖްތައް ކިތަންމެ ވަރަކަށް ފޮނުވި ނަމަވެސް އެއަށް ޖަވާބެއް ނުދެއްވާ ކަމަށެވެ.
އަދި މީގެ އިތުރުން ކެމްޕެއިންގެ ކަންތަކާއި ބެހޭގޮތުން އެކޮމެޓީގައި ހިމެނިވަޑައިގަންނަވާ ޕީޕީއެމްގެ އައްޑޫގެ ދެ މެމްބަރުންނަށް ގުޅުމުން ފަހުން ގުޅާނެ ކަމަށް ވިދާޅުވާ ކަމަށާއި ނަމަވެސް އެއްވެސް ކަހަލަ އެހީތެރިކަމެއް ނުލިބޭ ކަމަށް ހަސަން ބުންޏެވެ.
"ރައީސް ޔާމީން އައްޑޫ ސިޓީ ކައުންސިލް ގޮނޑިތައް ޕީޕީއެމްއިން ކާމިޔާބުކުރަން ބޭނުންވާއިރު. ޕާޓީގެ ސްޓިއަރިން ކޮމިޓީ އާއި މި ދާއިރާގެ ޕީޕީއެމް ގޮފިން ކެމްޕޭނަށް އެހީ ނުވުމަކީ ބަލައިގަނެވޭނެ ކަމެއް ނޫން"
ޙަސަން ނައީމް ބުނިގޮތުގައި އައްޑޫ ސިޓީކައުންސިލްގެ ގޮނޑިތައް ޕީޕީއެމް އިން ކާމިޔާބު ކުރުމަށް ރައީސް ޔާމީން ބޭނުންފުޅުވާއިރު، އެކަމަށް ޕާޓީން ކަނޑައެޅި ސްޓިއަރިން ކޮމިޓީއިން އެހީތެރިކަން ފޯރުކޮށް ނުދިނުމަކީ ބަލައިގަނެވޭނެ ކަމެއް ނޫން ކަމަށެވެ.
" ކެމްޕެއިންގައި އަޅުގަނޑާއި އެކު ތަރައްޤީ ޔަޤީންކުރަން ނިކުމެ މިތިބި ޕީޕީއެމްއަށް ތާއީދު ކުރާ ޒުވާނުން ވެސް މިތިބީ ކަންބޮޑުވެފައި މިކަންތައް ދާގޮތުން. އިންތިހާބަށް ކުޑަދުވަސްކޮޅަކަށް ވެފައިވާއިރު ކޮބާހޭ ސްޓިއަރިން ކޮމިޓީ"
ހަސަން ނައީމުގެ ކެމްޕެއިންގައި އިސްކޮށް ހަރަކާތްތެރިވާ ޒުވާނަކު 'އައްޑޫލައިވް' އާއި ވާހަކަ ދައްކަމުން ބުނި ގޮތުގައި، ހަސަން ހޮވުމަށް ވޮލަންޓިއަރކޮށްގެން ނިކުމެ ތިބި ޒުވާނުން މިހާރު ތިބީ ކެމްޕެއިންއަށް "ވާނުވާ" ނޭގޭތީ މާޔޫސްވެފައެވެ.
އިދިކޮޅު ކެންޑިޑޭޓުން ކެމްޕެއިން މެކުހަށް ޖަހާލި އިރު ވެސް މިކަން ކުރުމަށް ހަސަން އަކަށް ޕާޓީގެ މި ދާއިރާގެ ގޮފީގެ ތިބި މީހުން އެހީއެއް ނުވޭ. ހަސަނުގެ ފަހަތުގައި މިތިބި ޒުވާނުން މިތިބީ. އެކަމަކު ދެރަކަމަކީ ޕާޓީގެ ވެރިން މިކަމަށް އަޅާނުލާތީ"
ހަސަން އިތުރަށް ބުނީ ގޮތުގައި ހިތަދޫ ފުޓްބޯޅަ ޓީމުގެ ފަރާތުން ވެސް އެހީތެރިކަމަށް އެދި ބައްދަލުކުރި ކަމަށާއި އެވާހަކަ ވެސް ސަރުކާރުގެ އެކިވެރިންނަށް ދެންނެވި ކަމަށެވެ.
އެހެން ނަމަވެސް އެކަމުގައި މިހާތަނަށް އެހީތެރިކަން ލިބިފައި ނުވުމަކީ، ދާއިރާގެ ޒުވާނުންގެ ކުރިމަތީގައި އިސްދަށަށް ޖަހާލަން މަޖުބޫރު ވެފައިވާ ސަބަބެއް ކަމަށެވެ.
"މިއުޅެނީ ކެމްޕެއިން ޕޯސްޓަރެއްގެ މިންވަރުވެސް ނުލިބިގެން، މި ވާހަކަވެސް އެތައް ފަަހަރަކު އެތައް ގޮތަކަށް ދެންނެވިއްޖެ، މިކަން ހާސިލް ކުރުމަށް ބޭނުންވާ ހެން ހީނުވޭ"
ހަސަން ތަކުރާރުކޮށް ބުނީ ރައީސް ޔާމީން ކިތަންމެ ވަރަކަށް ކައުންސިލް ގޮޑިތައް ބޭނުން ނަމަވެސް އެކަމާއި ޒިއްމާވެ ތިބި ފަރާތްތަކުން އެކަން ކުރަން އުޅޭ ކަމުގެ މަންޒަރެއް ނުފެންނަކަށެވެ.
"ކިރިޔާވެސް އެހީތެރިކަމެއް، ހަބަރެއް މިވަނީ ޕީޕީއެމް ހަސަން ބޭބެގެ ފަރާތުން، އެކަމަކު ހަސަން ބޭބެއަކީ އިންތިހާބް ކާމިޔާބް ކުރުމަށް މާބޮޑު ޒިއްމާއެއް އޮތް ފަރާތެއް ނޫން، އެކަމުގައި ޒިއްމާވެގެން ތިބި މީހުން މިތިބީ ވަރަށް ބޮޑަށް އިހްމާލުވެފައި"
ޕީޕީއެމްގެ ފަރާތުން އައްޑޫގެ 7 ދާއިރާއަށް ކެންޑިޑޭޓުން ނެރެފައިވާއިރު ގޮޑި ކާމިޔާބް ކުރުމުގެ ފުރުސަތު އެންމެ ބޮޑު އެއް ކެންޑިޑޭޓަކީވެސް ހަސަން ނައީމް ކަމަށް އޭނާގެ ސަޕޯޓަރުން ބުނެއެވެ.