ހިތަދޫގައި ހަދާފައިވާ ފްލެޓްތައް ހަވާލު ނުކުރެވި ލަސްވަމުންދާތީ އެ ފްލެޓްތަކަށް ކުރިމަތިލި މީހުން ކަންބޮޑުވުން ފާޅު ކުރަމުން ދަނިކޮށް، ފްލެޓް އަންނަ މަހުގެ ތެރޭގައި ހަވާލު ކުރެވޭނެ މަމުގެ އުންމީދު ބޮޑު ކަމަށް ހައުސިން މިނިސްޓްރީން ބުނެފި އެވެ.
އެ މިނިސްޓްރީން ބުނެފައިވާ ގޮތުގައި ފްލެޓްތައް ހަވާލު ނުކުރެވި އެހާ ބޮޑަށް ލަސްވެގެން ދިޔައީ ފޯމްތަކުގެ އިވެލުއޭޝަނަށް ކުރިން ހީކުރި ވަރަށް ވަރު ގިނަ ވަގުތު ނެގުމުންނެވެ.
އެ މިނިސްޓްރީގެ އޮފިޝަލަކު ވިދާޅުވީ ހިތަދޫގެ ފްލެޓްތަކަށް ގުޅިފައިވާ އެހެން އަވަށްތަކުން ވެސް ކުރިމަތިލާފައިވާ އިރު، ގިނަ ވަގުތު ނެގީ ހިތަދޫން ފްލެޓްތަކަށް އެދި ހުށަހެޅި ފޯމްތަކުގެ މައުލޫމާތު ސައްހަ ކުރަން ކަމަށެވެ.
އެހެން ނަމަވެސް މިހާރު ފޯމްތައް އެއްކޮށް އިވެލުއޭޓްކޮށް ނިމިފައިވާ ކަމަށް މިނިސްޓްރީން ބުންޏެވެ.
ހިތަދޫގައި 264 ފްލެޓް އިމާރާތްކޮށްފައިވާ އިރު، ފްލެޓްތަކަށް ކުރިމަތިލާން މެއި 5، 2016 ގައި ހުޅުވާލައި މުއްދަތު ހަމަވި އިރު، 585 މީހަކު ފޯމް ލާފައިވެ އެވެ.
މި ފްލެޓްތަކަށް ޑައުންޕޭމަންޓަށް 25،000ރ. ދައްކަން ޖެހެ އެވެ. އަދި މަހު ކުލީގެ ގޮތުގައި 3،000ރ. ދައްކަން ޖެހެ އެވެ.
ހައުސިން މިނިސްޓްރީން އަދި ބުނީ ފްލެޓްތައް ހަވާލު ކުރާ އިރު، އެތަންތަނަށް ވަގުތީ ނަރުދަމާ ނިޒާމެއް ގާއިމު ކުރުމުގެ މަސައްކަތް ވެސް މިހާރު ކޮންޓްރެކްޓް އުސޫލުން ބަޔަކާ ހަވާލުކޮށްގެން ކުރިއަށްދާ ކަމަށެވެ.