މާލެ އާއި ރާއްޖޭގެ އެންމެ ދެކުނުގެ ދެ އަތޮޅުގައި ކުނި މެނޭޖް ކުރުމުގެ މަސައްކަތް ވޭސްޓް ޑިވެލޮޕްމަންޓް ކޯޕަރޭޝަން (ވެމްކޯ) އިން މިހާރު ކުރަމުން އަންނަ އިރު، އެކުންފުނީގެ އައްޑޫ ރީޖަނަލް އޮފީހުގައި މިހާރު ތިބީ ހުސް ދިވެހި މުވައްޒަފުން ކަމަށް އެ ކުންފުނިން ބުނެފި އެވެ.
ޓީވީއެމްގެ "ރާއްޖެ މިއަދު" ޕްރޮގްރާމްގައި ވެމްކޯގެ ބިޒްނެސް ޑިވެލޮޕްމަންޓް އޮފިސަރު އަހުމަދު އިގްބާލް ރޭ ވިދާޅުވީ އެ ކުންފުނީގެ އައްޑޫގެ އެންމެ އިސް މަގާމުތަކުން ފެށިގެން، އެންމެ އާދައިގެ ވަޒީފާތަކުގައި ވެސް ތިބީ ދިވެހިން ކަމަށެވެ.
އެގޮތުން މާލެ އާއި އައްޑޫ އަދި ފުވައްމުލަކުގައި ކުނި ކަލެޓް ކުރަން ވެސް ތިބީ ހުސް ދިވެހިން ކަމަށް އޭނާ ވިދާޅުވި އެވެ.
އިގްބާލް ވިދާޅުވީ ވެމްކޯގެ މަސައްކަތްތަކަށް ބޭނުން ވަނީ ދިވެހިން ކަމަށާއި އެއްވެސް މަގާމަކަށް ބިދޭސީން ގެނައުމުގެ ވިސްނުމެއް ނެތް ކަމަށެވެ. ނަމަވެސް މާލޭގައި އަދި ބިދޭސީ މުވައްޒަފުން ތިބިކަން އިގްބާލް ފާހަގަ ކުރިއެވެ.
އިގްބާލް ވިދާޅުވީ ވެމްކޯ އިން މިހާރު ކުނި މެނޭޖް ކުރަމުން އަންނަ އިރު މާލެ އާއި އައްޑޫގެ އިތުރުބް ފުވައްމުލަކުން ވެސް މި ހދުމަތަށް ވަރަށް ބޮޑު ތަރުހީބެއް ލިބެމުން އަންނަ ކަމަށެވެ.
އެހެނވެ ކުނި ކަލެޓް ކުރަން ބޭނުންވާ އިތުރު އުޅަނދުތަކަށް މިހާރު ވެސް އޯޑަރު ދީފައިވާ ކަމަށާއި ދޮޅު މަހެއްހާ ދުވަހުގެ ތެރޭގައި އެ ތަކެތި އަންނާނެ ކަމަށް ބުންޏެވެ.