އައްޑު އަށް ވާރޭ ނުވެހި ގިނަ ދުވަސްތަކެއްވުމާ ގުޅިގެން، ބޯ ފެނުގެ ދަތިކަން ކުރިމަތިވެ، މިނެރަލް ވޯޓާގެ ޑިމާންޑް ބޮޑުވެއްޖެ އެވެ.
އެހެން ނަމަވެސް މިދުވަސްކޮޅު މިނެރަލް ވޯޓަ ލިބުން ވެސް ދަތިވެފައިވެ އެވެ.
އެގޮތުން އައްޑު އަށް އެންމެ ގިނަ އަދަދަކަށް "ލައިފް" ފެން އެތެރެ ކުރާ ހެޕީ މާކެޓުން ފެން ހުސްވެފައިވާތާ ދެ ހަފުތާއެއްހާ ދުވަސްވެއްޖެ އެވެ.
ހެޕީ މާކެޓުން ބުނީ "ލައިފް" ފެންފުޅީގެ އެއްވެސް ސައިޒެއް މިހާރު އައްޑޫން ލިބެން ނެތް ކަމަށެވެ. އަދި ފެން އަލުން ލިބޭނެ ދުވަހެއް ބުނަން ދަތި ކަމަށް އެތަނުން ބުންޏެވެ.
އައްޑޫގައި ހުންނަ ކޮކޯ ކޯލާ އިން މިވަގުތު "ބޮނަކްއާ" ފެން ލިބުނު ނަމަވެސް، ފިހާރަތަކާއި ރެސްޓޯރަންޓްތަކާއި ގޭބިސީތަކަށް ބޭނުންވާ ވަރަށް ފެން ނުލިބޭކަން ފާހަގަ ކުރެވެ އެވެ.
މީގެ އިތުރިން އެސްޓީއޯ އިން ވިއްކާ "ތާޒާ" ފެނު ހޯދުމުގައި ވެސް ދަތިކަން ވަރަށް ބޮޑަށް މިހާރު ވަނީ ކުރިމަތިވެފަ އެވެ.
އައްޑޫގެ ގިނަ ގޭބިސީތަކުގައި ތާނގީ ހުރި ނަމަވެސް، ފެން ނެގޭ ވަރަށް ވާރޭ ނުވެހާތާ ގިނަ ދުވަސްތަކެއްވުމާ ގުޅިގެން ގިނަ ގޭބިސީތަކުގެ ތާނގީތައް މިހާރު ހުރީ ހުހަށެވެ.
އަދި އަވަށްތަކުގައި ހުރި އާންމު އިސްކުރި ބަރިތަކުން ވެސް ވަނީ ފެން އެއްކޮށްހެން ހުސްވެފަ އެވެ.
އައްޑޫ ފެނަށް ޖެހިފައިވާ އިރު، އައްޑޫގައި އަމިއްލަ ބަޔަކު ބޮޓްލިން ޕްލާންޓެއް ގާއިމުކޮށްފައި ހުރި ނަމަވެސް، އެތަނުގެ ހިދުމަތް އަދި އެންމެ އެކަށީގެންވާ ގޮތަކަށް ނުލިބޭކަން ވެސް ފާހަގަކޮށްލެވެ އެވެ.