އުރީދޫ މޯލްޑިވްސްގެ ހިއްސާ އާއްމުނަށް ވިއްކަން ނިންމައި އެކަން ރޭ ރަސްމީކޮށް އިއުލާންކޮށްފި އެވެ.
އުރީދޫން ރޭ ދަރުބާރު ގޭގައި ބޭއްވި ކުލަގަދަ ހަފުލާފައި ބުނީ ހިއްސާ ވިއްކަން ފަށާނީ މި މަހުގެ 30 ވަނަ ދުވަހުން ފެށިގެން ކަމަށެވެ.
އުރީދޫ މޯލްޑިވްސްގެ އައިޕީއޯ ޕްރޮސްޕެކްޓަސް ރަސްމީކޮށް ތައާރަފްކޮށް ދެއްވީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު ޑރ. އަޒީމާ އާދަމެވެ.
އުރީދޫން ބުނީ އެ ކުންފުނީގެ ކޮންމެ ހިއްސާއެއް ވިއްކާނީ 30ރ. އަށެވެ. ހިއްސާ ވިކަން ފަށާ އިރު ކުންފުނީގެ 15 ޕަސަންޓް ހިއްސާ ވިއްކި ނަމަވެސް ތަރުހީބަށް ބަލައިފައި އެ އަދަދު 40 ޕަސަންޓަށް އިތުރު ކުރާނެ ކަމަށް ވެސް އުރީދޫން ބުންޏެވެ.
އަޒީމާ ރޭ ވިދާޅުވީ އުރީދޫން ރާއްޖޭގެ ޙިއްސާގެ ބާޒާރަށް ވަދެ ޙިއްސާ ވިއްކަން ނިންމި ނިންމުމަކީ ހިއްސާގެ ބާޒާރުގެ އިތުބާރު ބޮޑުވެގެން ދާނޭ ކަމެއް ކަމަށެވެ.
ރޭ އުރީދޫ ގްރޫޕްގެ ޑެޕިއުޓީ ސީއީއޯ ވަލީދު އަލް ސައްޔިދު ވިދާޅުވީ، އުރީދޫ މޯލްޑިވްސްއިން ރާއްޖޭގައި ކާމިޔާބު ޙިދުމަތްތަކެއް ދެއްވަމުން އަންނަ ކަމަށާއި އެ ކުންފުނިން ރާއްޖޭގައި ކުރަމުން އަންނަ އިންވެސްޓްމަންޓްތަކުގެ އުއްމީދު ބޮޑު ކަމަށެވެ.
ރިދޫގެ ޚިދުމަތް ރާއްޖޭގައި ފެށީ އޮގަސްޓް 1، 2005 ގަ އެވެ.