ލޯބިވެރިޔާ ނުވަތަ ބައިވެރިޔާއާ އޮންނަ ގުޅުން ކުޑަ ވަނީ ހެއްޔެވެ؟ ދެ މީހުންގެ ދޭތެރޭގައި ވާހަކަ ނުދެކެވި، އެެދެވޭ ވަރަށް ކަންކަން ހިއްސާ ނުކުރެވެނީ ހެއްޔެވެ؟ މިފަދަ ކަންކަމާ ހެދި ގުޅުމަށް ބުރޫ އަރަނީ ހެއްޔެވެ؟
ގުޅުމެއްގެ ތެރޭގައި އުޅޭ އިރު މިފަދަ ސުވާލުތައް ސިކުނޑި ތެރޭގައި އެނބުރޭ ނަމަ އެއީ ސީރިއަސްކޮށް ވިސްނަން ޖެހޭ ކަމެކެވެ.
އެެއްވެސް މީހަކު ތިމާގެ ލޯބިވާ ބައިވެރިޔާއާ ވަކިވާކަށް ބޭނުނެއް ނުވާނެ އެވެ.
އެކަމަކު ގުޅުމެއް ދެމެހެއްޓޭނީ އެކަމަށް މަސައްކަތްކޮށްގެންނެވެ. ހިތްވަރުލައިގެންނެވެ. އެއް އަތުން އަތްތިލަ ބަޑިއެއް ނުޖެހޭނެކަން އަމިއްލަ އަށް ގަބޫލު ކުރަން ވާނެ އެވެ. ހަގަގީތަކީ އެއީ އެވެ.
ފަހުގެ ދިރާސާއަކުން ދައްކާފައިވާ ގޮތުގައި ބައިވެރިޔާއާ އޮންނަ ގުޅުން ބަދަހި ކުރަން ބޭނުން ނަމަ، ކުރެވިދާނެ އެންމެ މުހިއްމު އެއް ކަމަކީ އެކަކު އަނެކަކަށް ޝުކުރުވެރިވުމެވެ.
އެކަކު އަނެކަކަށް ކޮށްދޭ ކަންކަމަށް ހިތުގެ އަޑިން ޝުކުރު އަދާ ކުރުމެވެ. އަދި އެކަން ބައިވެރިޔާ ކައިރީގައި ބުނުމެވެ.
ވާހަކަތައް ދެކެވި ކަންކަން ހިއްސާ ކުރެވޭ ނަމަ، ގުޅުމުގެ ބާރު ގަދަވާނެ އެވެ.
"އެކަކު އަނެކަކަށް ޝުކުރު އަދާ ކުރުމަކީ ގުޅުމެއްގެ ތެރޭގައި ވަރަށް މުހިއްމު ކަމެއް. އެއީ އެފަދަ މީހެއްގެ ނަފުސާނީ ދުޅަހެޔޮކަމާއި ޖިސްމާނީ ދުޅަހެޔޮ ކަމަށް ވެސް ބާރު އަޅައިދޭ ކަމެއް،" ދިރާސާ ހެދުމުގައި ބައިވެރިވި އެމެރިކާގެ ނެޝަނަލް ކޮމިއުނިކޭޝަން އެސޯސިއޭޝަން (އެންސީއޭ) ގެ މެމްބަރެއް ކަމަށްވާ ސްޓެފެން އެމް. ޔޮޝިމޫރާ ބުންޏެވެ.
އޭނާ އަދި ބުނީ އެކަކު އަނެކަކަށް ޝުކުރުވެރިވުމަކީ ކަންކަމާ ދޭތެރޭ ޕޮޒިޓިވްކޮށް ދެކެން ބާރު އަޅައިދޭ، އުންމީދުތައް އާލާވާ ކަމެއް ކަމަށެވެ.
ދިރާސާގައި ފާހަގަކޮށްފައިވާ ގޮތުގައި ބައިވެރިޔާ އަށް ޝުކުރުވެރިވުމަކީ ސިއްހީ ގޮތުން ގިނަ ފައިދާތަކެއް ވެސް ކުރުވާ ކަމެކެވެ.
އެގޮތުން ތަފާތު ބަލިތަކުން ދުރުކޮށް ދިނުމާއި، ދިރިއުޅުމާ ދޭތެރޭ އުންމީދު އާލާކޮށް ދިނުމުގެ ފުރުސަތު އެކަމުން ފަހިކޮށްދެ އެވެ.