ސަލްމާން ހާންގެ ކުރިއަށް އޮތް ފިލްމް "ޓިއުބްލައިޓް" ރިލީޒް ކުރާ ދުވަސް ވެސް އިއުލާންކޮށްފައި ވަނިކޮށް، ފިލްމުގެ ފުރަތަމަ ޕޯސްޓަރު ވެސް ދައްކާލައިފި އެވެ.
މި އަހަރު އެންމެ ގިނަ ބަޔަކު އިންތިޒާރު ކުރަމުން އަންނަ މި ފިލްމް ސިނަމާތަކަށް އަންނާނީ އަންނަ ޖޫން މަހުގެ 23 ގަ އެވެ. އެއީ މި އަހަރުގެ ފިތުރު އީދު ދުވަހެވެ.
"ޓިއުބްލައިޓް" އަކީ ހަނގުރާމައިގެ ހާދިސާއެއްގެ ތެރެއިން ލޯބީގެ ވާހަކަތަކެއް ވެސް ކިޔައިދޭ ފިލްމެކެވެ. މި ފިލްމް ޑައިރެކްޓްކޮށްފައި ވަނީ ސަލްމާންގެ "ބަޖިރަންގީ ބައިޖާން" އާއި "އެކް ތަ ޓައިގާ" ޑައިރެކްޓަރު ކަބީރު ހާނެވެ.
ޗައިނާ އާއި އިންޑިއާ ގުޅޭ ބޯޑަރުގެ މައްސަލާގައި 1962 ގައި ހިނގާ ހަނގުރާމައެއްގެ މައްޗަށް ބިނާކޮށްފައިވާ "ޓިއުބްލައިޓް" ގައި ސަލްމާނާ އެކު ބަތަލާއެއްގެ ގޮތުގައި ފެނިގެން ދާނީ ޗައިނާގެ ބަތަލާ ޒޫ ޒޫ އެވެ.
މީގެ އިތުރުން ފިލްމުން ސަލްމާންގެ ކޮއްކޮ ސުހައިލް ހާން ވެސް ފެނިގެންދާ އިރު، ހާއްސަ ފެނިލުމަކުން ޝާހްރުކް ހާން ވެސް ފެނިގެން ދާނެ އެވެ.
"ޓިއުބްލައިޓް" ގެ ޓްރެއިލާ މި މަހުގެ ތެރޭގައި ދައްކާލަން ވެސް ވަނީ ހަމަޖެހިފަ އެވެ.