ކޮކޯ ކޯލާ ކުންފުނީގެ އައްޑޫ ޑިސްޓްރިބިއުޝަން ސެންޓަރުން ވިއްކަމުން އަންނަ ބޮނަކުއާ ފެންފުޅި ހުސްވެފައިވާ ކަމަށް އެތަނުން ބުނެފި އެެވެ.
އެ ސެންޓަރުގެ އޮފިޝަލަކު މިއަދު "އައްޑޫ ލައިވް" އަށް ބުނީ މި ވަގުތު 1.5 ލީޓަރާއި 500 އެމްއެލްގެ ފެންފުޅި ވެސް ހުސްވެފައިވާ ކަމަށެވެ.
"އެންމެ ކުދި ފުޅި ކޮންމެވެސް ވަރަކަށް ސްޓޮކްގައި އެބަހުރި،" އޭނާ ބުންޏެވެ. "ފެން އަލުން ލިބޭނެ ދުވަހެއް ބުނަން ވެސް ދަތި."
ކޮކޯ ކޯލާ އައްޑޫ ޑިސްޓްރިބިއުޝަން ސެންޓަރުން ފެން ހުސްވެފައި ވަނީ އައްޑު އަށް ވާރޭ ނުވެހި ގިނަ ދުވަސްތަކެއްވުމާ ގުޅިގެން، ވާރޭ ފެނުގެ ދަތިކަން ކުރިމަތިވެ، މިނެރަލް ވޯޓާގެ ޑިމާންޑް މައްޗަށް ގޮސްފައި ވަނިކޮށެވެ.
އައްޑު އަށް "ލައިފް" ފެން އެތެރެކޮށް ވިއްކާ ހެޕީ މާކެޓާއި "ތާޒާ" ފެން ވިއްކާ އެސްޓީއޯ އިން ވެސް މިހާރު ވަނީ ފެން ހުސްވެފަ އެވެ.
އެ ތަންތަނުން ބުނި ގޮތުގައި ފެން ލިބޭނެ ދުވަހެއް ބުނަން ދައްޗެވެ.
ފެން ސަޕްލައިކޮށްދޭ ތަންތަނުން ފެން ހުސްވެފައިވާ އިރު، ބައެއް ފިހާރަތަކުން ފެންފުޅި ގަންނަން ލިބެން ހުރިކަން ފާހަގަކޮށްލެވެ އެވެ.