ދިވެހިންގެ ތެރޭގައި ވެސް ވަރަށް މަގުބޫލް އިންޑިއާގެ ބޭންޑެއް ކަމަށްވާ "ސަނަމް" ގެ އާ ވީޑިއޯ ލަވައެއް ބެލުންތެރިންނަށް ދޫކޮށްލައިފި އެވެ.
އެކަމަކު މި ފަހަރުގެ ލަވައަކީ ސަނަމް ޕޫރީގެ އަޑުން ކިޔާފައިވާ ހިތްގައިމު ހިންދީ ލަވައެއް ނޫނެވެ. ލަވަ މިހާރު ކިޔާފައި އޮތީ ސްޕެނާއި މެކްސިކޯ ބަހުންނެވެ. ލަވައިގެ ނަމަކީ "ލަ ބަމްބާ" އެވެ.
މި ލަވައިން ސަަނަމް ބޭންޑްގެ މެމްބަރުންނާ އެކު، އެކްޓަރުންތަކެއް ލަވައެއް ނަށާ ތަން ވެސް ފެނެ އެވެ.
"ލަ ބަމްބާ" ލަވަ ޔޫޓިއުބަށް އިއްޔެ ދޫކޮށްލުމާ އެކު، އޭގެ ވިއުސް މިހާރު ވަނީ ލައްކައަކަށް ވުރެ މައްޗަށް އަރައިފަ އެވެ.
ސަނަމް ޕޫރީ އެންމެ ބޮޑަށް މަޝްހޫރު ކުރީގެ ހިންދާ ލަވަތައް މި ޒަމާނަށް ފައްތައިގެން ކިޔާ ލަވަ ކިޔުންތެރިއެއްގެ ގޮތުގަ އެވެ.
މީގެ އިތުރުން މި ފަހުން އޭނާ ވަނީ އަމިއްލަ ރާގުގެ އާ ލަވަތަކެއް ކިޔައި، އެ ލަވަތަކުގެ ވީޑިއޯ ވެސް ނެރެފަ އެވެ.
ސަނަމްއަކީ ރާއްޖޭގެ ދެ ޝޯ ވެސް ދީފައިވާ ބޭންޑެކެވެ. އެއީ މާލެ އާއި އައްޑޫގަ އެވެ.
އަދި އައްޑޫގައ އެ ބޭންޑްގެ ލަވައެއްގެ ވީޑިއޯ ވެސް ކުޅެފައިވެ އެވެ. އެއީ ރާއްޖޭގެ މަޝްހޫރު އަންހެން ލަވަ ކިޔުންތެރިޔާ މީރާ މުހައްމަދު މާޖިދާ އެކު ކިޔާފައިވާ ލަވައެކެވެ.