މި އަހަރު ބާއްވާ ރިޔާސީ އިންތިހާބުގައި ޕީޕީއެމްގެ ޓިކެޓްގައި ވާދަ ކުރައްވާ ކެންޑިޑޭޓަކު ހޮވުމަށް ބާއްވާ ޕްރައިމަރީޒް އަންނަ މަހުގެ 30 ގައި ބޭއްވުމަށް ނިންމައިފި އެވެ.
ޕްރައިމަރީ އަށް ނަން ހުށަހެޅުމުގެ އެންމެ ފަހު ތާރީހެއްގެ ގޮތުގައި ކަނޑައަޅަފައި ވަނީ މި މަހުގެ 25 ވަނަ ދުވަހެވެ.
ރިޔާސީ ޓިކެޓަށް އެންމެ ބޮޑަށް މަސައްކަތް ކުރައްވަމުން ގެންދަވާ ދެ ބޭފުޅުންގެ ގޮތުގައި ފާހަގަ ކުރެވިފައި ވަނީ ޕީޕީއެމްގެ ޕާލިމަންޓްރީ ގްރޫޕްގެ ލީޑަރު އަދި ރައީސް މައުމޫންގެ އެއްބަފާ ކޮއްކޯފުޅު އަބްދުﷲ ޔާމިން އާއި ޕީޕީއެމްގެ ކުރީގެ ނައިބް ރައީސް އުމަރު ނަސީރެވެ.
މީގެ އިތުރުން މި އިންތިހާބުގައި ރައީސް މައުމޫންގެ އަނބިކަބަލުން ނަސްރީނާ އިބްރާހިމްގެ ބޭބެ އިލްޔާސް އިބްރާހިމް އާއި އެފްއޭމްގެ ރައީސް އިލްހާމް އަހުމަދު ވާދަކުރައްވާނޭ ކަމުގެ އަޑުތަކެއްވެސް ވަނީ ފެތުރިފަ އެވެ.
މި އިންތިހާބުގައި އެޕާޓީގެ ރައީސް މައުމޫން އަބްދުލް ގައްޔޫމް ވާދަ ކުރެއްވުމާ މެދު އަދި ވަކިގޮތެއް ނިންމާފައި ނުވާކަން ވެސް ފާހަގަކޮށްލެވެ އެވެ.