"އޮއިލް ޕުލިން" އަކީ ކޮބައިކަން އެނގޭހެއްޔެވެ؟ އެއީ އިނގިރޭސި ބަހެކެވެ. އެ ބަހުގެ ދިވެހި މާނައަށް ބަލާއިރު އެއީ ކޮންމެ ދުވަހަކު ހެނދުނު ހުސްބަނޑާއި ހުރެ އެއް މޭޒުމަތީ ސަމުސާ ކާށިތެޔޮ 20 މިނެޓް ވަންދެން އަނގައިގައި ބެހެއްޓުމެވެ. މީގެ ބޭނުމަކީ ހަށިގަނޑުގައި ހުންނަ ވިހަ މާއްދާތައް ނައްތާލުމެވެ. ތިރީގައި މިވަނީ މިގޮތަށް ޢަމަލު ކުރުމުގެ ބައެއް ފައިދާތަކެވެ.
1. ދަތް ހުދު ކުރުން
ކާށި ތެލުގައި ޤުދުރަތީ އެންޓިބެކްޓީރިއަލް މާއްދާތައް އެކުލެވިގެން ވުމާއިއެކު، އެއީ ޖަރާސީމުތައް ނައްތާލައި ދަތް ސާފުކޮށް ހުދުކޮށްދޭ އެއްޗެކެވެ. ދަތް ހުދު ކުރުމަށް ބޭނުން ކުރާ ކެމިކަލް ކްރީމްތަކަށްވުރެ ކާށި ތެޔޮގެ ފައިދާ މާބޮޑެވެ.
2. ހަށިގަނޑުން ވިހަތައް ނައްތާލަދޭ
ހަށިގަނޑަށް އެންމެ ގިނައިން ޖަރާސީމު ވަންނަނީ އަނގައިންނެވެ. އެހެންކަމުން ކޮންމެ ދުވަހަކު ހެނދުނު ދަތް އުނގުޅައި ދަތް ސާފުކޮށް ބަހައްޓާނަމަ، ހަށިގަނޑުވެސް ސާފުވެގެން ދާނެއެވެ. "އޮއިލް ޕުލިން" ގެ ސަބަބުން ވިހަ މާއްދާތައް ހަށިގަނޑުގެ ތެރެއަށް ވަނުމުގެ ކުރިން ނައްތާލެވެ އެވެ. އެހެންކަމުން އިންފެކްޝަންތަކުން މީހާ ދުރުހެލިވެގެން ދެއެވެ.
3. ދަތުގެ ސިއްޙަތު ރަނގަޅުވުން
ކާށި ތެޔޮ ބޭނުން ކުރުމަކީ ދަތް ހަލާކު ކުރާ ސްޓްރެޕްޓޮކޯކަސް ބެކްޓީރިއާ ނައްތާލަދޭ ކަމެކެވެ. މީގެ އިތުރުން ދަތުގައި ޖަރާސީމު ހަރުލުމުގެ ސަބަބުން ދިމާވާ މައްސަލަ ކަމަށްވާ ޖިންޖިވައިޓިސް އިން ވެސް ސަލާމަތްކޮށް ދެއެވެ.
4. އަނގައިން ނުބައި ވަސް ދުވުމުން ދުރުހެލިކޮށްދޭ
ހެނދުނު ކާށި ތެޔޮ ބޭނުން ކުރުމުގެ ސަބަބުން އަނގައިގައި ނުބައިވަސް ދުވުމަށް މަގުފަހިކޮށްދޭ ބެކްޓީރިއާތައް މަރުވެ އެވެ. އެހެންކަމުން ނުބައިވަސް ދުވުމުގެ މައްސަލަ ހައްލުވެގެން ދެއެވެ.
ހަނދާނުގައި ބަހައްޓަން ޖެހޭ ބައެއް ކަންތައްތައް:
"އޮއިލް ޕުލިން" އަކީ ދަތް އުނގުޅުމުގެ ބަދަލުގައި ކުރާ ކަމެއް ނޫނެވެ. ކޮންމެ ދުވަހަކު ކާށި ތެޔޮ ބޭނުން ކުރުމަށްފަހު ދަތް އުނގުޅަން ވާނެއެވެ.
ހެނދުނު ކާށި ތެޔޮ ބޭނުންކުރާއިރު އެކަށީގެންވާ މިންވަރު ބޭނުން ކުރުމަކީ މުހިންމު ކަމެކެވެ. އެންމެ އެދެވިގެންވާ މިންވަރަކީ ކޮންމެ ދުވަހަކުވެސް އެއް މޭޒުމަތީ ސަމުސާ ތެޔޮ ބޭނުން ކުރުމެވެ.
އެންމެ ފުރަތަމަ ފަށައިގަންނައިރު، ތެޔޮ އަނގައިގައި ބަހައްޓަންވީ ފަސް މިނެޓަށެވެ. އެއަށްފަހު 20 މިނެޓާއި ހަމައަށް އެކި ދުވަސް މަތިން މަޑުމަޑުން ވަގުތު އިތުރު ކުރާށެވެ. އެންމެ ފުރަތަމަ ދުވަހު އެހާ ގިނައިރު ވަންދެން ތެޔޮ އަނގައިގައި ބަހައްޓައިފިނަމަ، ހިރުގަނޑުގައި ރިއްސަން ފަށާފާނެއެވެ.
ދުވަހަކުވެސް ތެލުގެ އެންމެ ތިއްކެއްވެސް ދިރުވައިގެން ނުވާނެ އެވެ. ނުދިރުވާ އަނގައިގައި ނުބެހެއްޓޭނެހެން ހީވާނަމަ، ތެޔޮ ބޭނުންކުރާ މިންވަރު މަދު ކުރާށެވެ.