ކައުންސިލް އިންތިހާބަށް ވާދަ ކުރާ ހުޅުދޫ ދާއިރާގެ ޕީޕީއެމް ކެންޑިޑޭޓް އަލީ މުހައްމަދު (އައްދު) ގެ ކެމްޕެއިން ހަރަކާތުގެ ތެރެއިން އިއްޔެ ހަވީރު ހުޅުދޫ ބޮޑު މަގުތަކުގައި ކުރިއަށް ގެންދިޔަ ވެހިކަލްގައި އެދާއިރާގެ މެމްބަރު މުހައްމަދު ޝާހިދު (ޝާޑް) އާއި އަނބިކަބަލުން އަދި ޔޫތު މިނިސްޓަރު އިރުތިޝާމް އާދަމް ބައިވެރިވެއްޖެ އެވެ.
ހުޅުދޫ ބަނދަރު ސަރަހައްދުން ފެށި މި ވެހިކަލް ބުރުގައި އައްދު އާއި ޝާޑް އަދި އިރުތިޝާމްގެ އިތުރުން އައްދުއަށް ތާއިދު ކުރާ ދެ ޖިންސްގެ ގިނަ ބަޔަކު ބައިވެރިވި އެވެ.
މިހާރުވެސް ހުޅުމީދޫ ދާއިރާ ތަމްސީލް ކުރައްވާ އައްދުއަށް ތާއިދު އިތުރުކުރުމުގެ ގޮތުން ކެމްޕެއިން ޓީމުން އަންނަނީ ގިނަ ހަރަކާތްތަކެއް އިންތިޒާމް ކުރަމުންނެވެ. ހުޅުދޫގެ ޒުވާނުންނާއި، ބައެއް ރައްޔިތުން ބުނާ ގޮތުން އައްދުވަނީ ކައުންސިލްގައި މިވީ ދުވަސްކޮޅު ތެރޭގައި އޭނާގެ ގާބިލްކަން ދައްކާފައިކަމަށާއި އެފުރުސަތު ދެން އެހެން މީހަކަށް ދޭން ބޭނުން ނޫންކަމަށެވެ.
މި ވެހިކަލް ބުރުގެ ކުރިން ހުޅުދޫ ދާއިރާގެ މެމްބަރު ޝާޑް ވިދާޅުވީ ހުޅުދޫ އަދި މީދޫއަށް ބޮޑެތި ތަރައްޤީގެ މަޝްރޫއުތައް އަންނަން ފަށާފައިވާ ކަމަށާއި މިމަހުގެ ތެރޭގައި ނަރުދަމާގެ އަމަލީ މަސައްކަތް ދެ ރަށުގައި އެކުގައި ފެށިގެންދާނެ ކަމަށެވެ. މީގެ އިތުރުން ވޭސްޓް މެނޭޖްމަންޓް ކޯޕަރޭޝަން އާއި ހަވާލު ކުރެވިގެން ކުނީގެ މައްސަލަ ހައްލު ކުރުމުގެ މަސައްކަތް ފަށާފައިވާ ކަމަށެވެ.
އަދި ދެ ރަށުގެ ގިރާ ސަރަހައްދު ބޮޑު ހިލަ ޖަހައިގެން ސަލާމަތް ކުރުމުގެ މަސައްކަތް ކުރިއަށްދާ ކަމަށް ޝާޑް ވިދާޅުވިއެވެ. ޝާޑް ވިދާޅުވީ ސަރުކާރުން ހާއްސަ އިސްކަމެއް ދެއްވައިގެން ހުޅުމީދޫ ތަރައްޤީ ކުރުމަށް މަސައްކަތް ކުރަމުން އަންނަ އިރު ސަރުކާރު ތަމްސީލް ކުރާ މެމްބަރަކު ހުރުން މުހިއްމު ކަމަށެވެ.