ޝަންގްރިއްލާ އިން މީދޫ "ކާޑުގެ" މަރާމާތު ކުރުމަށް ބޭނުންވާ ސާމާން ދިނުމަށް އެއްބަސް ވެފައިވާ ކަމަށް މީދޫ ކޯޕަރޭޓްސް އިން ބުނެފި އެވެ.
ޝަންގްރިއްލާ އަށް ބޭނުންވާ ތަރުކާރީ އާއި މޭވާ ގިނައަދަދަކަށް ސަޕްލައި ކުރާ މީދޫ ކޯޕަރޭޓްސް އިން ބުނީ ދާދި ފަހުން ޝަންގްރިއްލާގެ ޖީއެމް މީދު އަށް ޒިޔާރަތްކޮށް މީދޫ ކާޑުގެ ބެލުމަށް ފަހު ކޮމިއުނިޓީއަށް އެހީވެދި ނުމުގެ ގޮތުން އެތަން މަރާމާތު ކުރުމަށް އެއްބަސްވެފައިވާ ކަމަށެވެ.
"ވަރަށް ފަހުން މީދޫއަށް ޖީއެމް ވަޑައިގެން އެކި ތަންތަން ބަލަމުން ގޮސް ކާޑުގެ ބެލީ، އެތަނަނަކީ އާސަރީ ތަނަކަށް ވުމުން އެތަން ހިމާޔަތް ކޮށް ރަށުގެ ކޮމިއުނިޓީ އަށް ބޭނުން ކުރެވޭ ގޮތަކަށް އެތަން މަރާމާތުކޮށް ދޭން މިހާރު އެ ބޭފުޅުން އެއްބަސްވެއްޖެ،" މީދޫ ކޯޕަރޭޓްސްގެ އިސް އޮފިޝަލަކު ވިދާޅުވި އެވެ.
އޮފިޝަލް ވިދާޅުވީ އެޕްރޮޖެކްޓަށް 20،000 ޑޮލަރަށް ވުރެ ބޮޑު ހަރަދެއް ހިނގާ ކަމަށެވެ.
"މި ޕްރޮޖެކްޓަށް ވިހި ހާސް ޑޮލަރަށް ބޮޑު ހޭދައެއްދޭ، އޭގެ ތެރޭގައި މަސައްކަތުގެ އަގާއި ސާމާންގެ އަގު ހިމެނޭ. އެހންވެ ޝަންގްރިއްލާއިން ބުނީ މަސައްކަތުގެ ބައި ރައްޔިތުންގެ ތެރެއިން މީހުން ގޮސް ކުރާ ގޮތަށް ހަމަޖައްސަން. އެގޮތަށް މިހާރު ނިމިފައި އޮތީ." އޭނާ ވިދާޅުވި އެވެ.
މިޕްރޮޖެކްޓާ ގުޅޭ ގޮތުން އޮފިޝަލް ވިދާޅުވީ އެތަން މަރާމާތު ކުރަނީ ތަނުގެ އަސްލު ނުގެއްލޭ ގޮތަށް ކަމަށެވެ.
އެގޮތުން ދެ ބުރިއަށް އިމާރާތް ކޮށްފައިވާ ތަނުގައި އަޅާފައިވާ ޑެކް ބަދަލުކޮށް ފުރާޅު ބަދަލު ކުރުމަށް ވަނީ ބަޖެޓްކޮށްފަ އެވެ. އަދި ރަށަށް ޒިޔާރަތް ކުރާ މެހްމާނުންނަށް ފާޙާނާ ކުރެވޭނެ ނިޒާމެެއް ގާއިމް ކުރުމަށް ދެ ފާހާނާ ހެދުމަށް ވަނީ ނިންމާފަ އެވެ. އަދި އެތަނުގައި ލައިބްރަރީއަކާއި ޗޭން ޖަމިއްޔާ އަށް އޮފީހެއް ހެދުމަށް ވަނީ ޕްލޭން ކުރެވިފަ އެވެ.
މި މަސައްކަތް ކުރިއަށް ގެންދަނީ މީދޫ ކޯޕަރޭޓްސް އާއި މީދޫގެ އަންހެނުންގެ ޖަމިއްޔާއެއް ކަމަށްވާ "ޗޭނު" ޖަމިއްޔާ ގުޅިގެންނެވެ.
ޝަންގްރިއްލާއިން ވަނީ މިދިޔަ އަހަރު ކާޑުގޭގައި ޕާކެއްވެސް ތަރައްޤީކޮށްދީފަ އެވެ. ޝަންގްރިއްލާގައި މަސައްކަތް ކުރާ މީދޫ މުވައްޒަފުންނާއި މީދޫ ޒުވާނުން އަދި ޖަމިއްޔާތައް ގުޅިގެން ހެދި ޕާކަކީ ރަށުގައި ދިރިއުޅޭ އުމުރުން ދުވަސްވީ މީހުންނަށް އަމާޒުކޮށްގެން ހެދި ތަނެކެވެ. އަދި އެތަނުގެ ބޭނުން އުމުރުން ދުވަސްވީ ބޭފުޅުން އަންނަނީ ހިފަމުންނެވެ.