އައްޑޫ ރައްޔިންގެ ޓްރަސްޓް ފަންޑްގެ ނަމުގައި އައްޑޫ ސިޓި ކައުންސިލުން ގާއިމުކޮށްފައިވާ ފަންޑުން ފުރަތަމަ ފަހަރަށް ބަޔަކަށް ފައިސާ ހަދިޔާކޮށްފި އެވެ.
އެ ފަންޑުން ފައިސާ ހަދިޔާކޮށްފައި ވަނީ ހިތަދޫ ހުކުރު މިސްކުތް މަރާމާތު ކުރުމަށްޓަކައި އެ އަވަށުގެ އަމިއްލަ ޖަމިއްޔާއަކަަށެވެ. އެއީ ޖަމިއްޔަތުލް އުލަމާ އެވެ.
އައްޑޫ ރައްޔިތުންގެ ޓްރަސްޓް ފަންޑުން އެ ޖަމިއްޔާ އަށް ހަވާލުކޮށްފައި ވަނީ 50،000ރ. އެވެ.
ކައުންސިލްގެ ފަރާތުން އެ ފައިސާ ޖަމިއްޔާއާ ހަވާލުކޮށް ދެއްވީ އައްޑޫ މޭޔަރު އަބްދުﷲ ސޯދިގް (ސޯބެ) އެވެ. އުލަމާގެ ފަރާތުން ފައިސާއާ ހަވާލުވެވަޑައިގެންނެވީ ހުސައިން ފަހުމީ އެވެ.
އައްޑޫ ރައްޔުތުންގެ ޓްރަސްޓް ފަންށް ގާއިމު ކުރީ މެއި 5، 2016 ގަ އެވެ.
އައްޑޫ ރައްޔިތުންގެ ޓްރަސްޓް ފަންޑްގެ ބޭނުމަކީ އައްޑޫ ސިޓީ ކައުންސިލް ހިމެނޭ ދާއިރާގެ ރައްޔިތުންނާއި ދާއިރާގެ ތަރައްގީ އަށް އެހީތެރިވުމަށް އެދޭ، ރާއްޖޭގައި ހިންގާ ވިޔަފާރިތަކުންނާއި އެ ނޫން ވެސް ފަރާތްތަކުން ތަރައްގީ އަށް ޚަރަދު ކުރުމަށް ދޭ ފައިސާ، އައްޑޫ ސިޓީ ކައުންސިލްގެ އައްޑޫ ރައްޔިތުންގެ ޓްރަސްޓް ފަންޑުގެ ޓްރަސްޓްގައި ބަހައްޓައި ބެލެެހެއްޓުމެވެ.
ފަންޑުން ކުރުން ހުއްދަ ހަރަދުތަކަކީ:
- އައްޑޫގެ އިގުތިސާދު ކުރިއެރުވުމަށް އެކިއެކި މަސައްކަތް ކުރުން
- އައްޑޫގެ އިޖުތިމާއީ ކުރިއެރުމަށް މަސައްކަތް ކުރުން
- އައްޑޫގެ އަންހެނުން ބާރުވެރި ކުރުވުމަށް އެކިއެކި މަސައްކަތް ކުރުން
- ފަންޑް ދިރުވަން ވިޔަފާރިތަކާއި އިންވެސްޓްމަންޓްތައް ކުރުން