ބޮލީވުޑްގައި މާ ބޮޑު ކާމިޔާބެއް ނުލިބުމުން ފިލްމް ކުޅުން ހުއްޓާލައިފައިވާ ކުރީގެ ބަތަލާ އީޝާ ޑިއޯލް މިހާރު އިނީ ފުރަތަމަ ދަރިފުޅަަށް ބަލިވެ ކަމަށް އިންޑިއާގެ މީޑިއާތަކުން ރިޕޯޓްކޮށްފި އެވެ.
އީޝާ، 35، އަކީ ކުރީގެ ވަރަށް މަޝްހޫރު ދެ ތަރިން ކަމަށްވާ ހެމާ މާލިނީ އާއި ދަރްމެންދްރާގެ ދޮށީ އަންހެން ދަރިފުޅެވެ.
އޭނާ 2012 ވަނަ އަހަރު ކައިވެނި ކުރީ ބާރަތު ތަޙްތާނީ ކިޔާ ވިޔަފާވެރިއަކާ އެވެ.
ރިޕޯޓްތައް ބުނާ ގޮތުން އީޝާ ވިހާނީ މި އަހަރުގެ ފަހުކޮޅު އެވެ.
ކޮއި މެރެ ދިލް ސެ ޕޫޗޭ (2002) އިން ބޮލީވުޑަށް ނިކުތް އީޝާގެ ފިލްމީ ކެރިއަރަށް ބަލާ އިރު، އޭނާގެ މާ ފާހަގަކޮށްލެވޭ ފިލްމުތަކެއް ނެތެވެ. ހަމައެކަނި ފާހަގަކޮށްލެވޭ އެއް ފިލްމަކީ "ދޫމް" އެވެ.
އޭނާ އެންމެ ފަހުން ކުޅުނު ފިލްމަކީ މަންމަ ހެމާ 2011 ގައި ޑައިރެކްޓް ކުރި "ޓެލް މީ އޯ ޙުދާ" އެވެ.
ފިލްމް ކުޅުން ހުއްޓާލި ފަހުން، އީޝާ އެންމެ ފަހުން ފެނުނީ 2015 ގައި އެމްޓީވީން ގެނެސް ދިން ރިއަލިޓީ ޝޯ "ރޯޑީޒް" އިންނެވެ.
އީޝާގެ ކޮއްކޮ އަހާނާ ޑިއޯލް ވެސް ކައިވެނިކޮށްގެން ވަނީ ދަރިއަކު ލިބިފަ އެވެ.