މިދިޔަ އަހަރުގެ ކުރީކޮޅު ރިލީޒް ކުރި "ޖެއި ގަންގާޖަލް" އަށް ފަހު، ޕްރިޔަންކާ ޗޯޕްޅާ މިހާތަނަށް އެއްވެސް ހިންދީ ފިލްމަކުން ފެނިފައެއް ނުވެ އެވެ. އަދި އޭނާ އެއްވެސް އާ ފިލްމަކަށް ސޮއެއް ވެސް ނުކުރެ އެވެ.
އެހެން ނަމަވެސް އެމެރިކާގެ ޓީވީ ސީރީޒް "ކްއަންޓިކޯ" ސީޒަން ދޭއް ނިންމައިލުމަށް ފަހު، ޕްރިޔަންކާ މިހާރު އެނބުރި އިންޑިއާ އަށް އައިސް އާ ފިލްމަކަށް ސޮއިކޮށްފި ކަމަށް ރިޕޯޓްތައް ބުނެ އެވެ.
އެ ފިލްމަކީ ގޭޓްވޭ ކިޔާ އާ ޕްރޮޑަކްޝަން ހައުސްއަކުން އުފައްދާ އަދި އާ މީހަކު ޑައިރެކްޓް ވެސް ކުރާ ފިލްމެކެވެ.
މިއީ އިންޑިއާގެ ފުރަތަމަ އެސްޓްރޮނޯޓް ކަލްޕަނާ ޗާވްލާގެ ހަޔާތުގެ މައްޗަށް ހަދާ ފިލްމެކެވެ.
އަދި ނަމެއް ދީފައި ނުވާ ފިލްމުގައި ޕްރިޔަންކާ ކުޅޭނީ ކަލްޕަނާގެ ރޯލެވެ.
މިއީ ބައޮޕިކެއް އޭނާ ކުޅޭ ދެވަނަ ފަހަރެވެ. ފުރަތަމަ ފިލްމަކީ އިންޑިއާގެ އަންހެން ބޮކްސިން ކުޅުންތެެރިޔާ މޭރީ ކޮމްގެ ހަޔާތުގެ މައްޗަށް ބިނާކޮށް 2014 ގައި ހެދި ފިލްމެވެ.
ރިޕޯޓްތައް ބުނާ ގޮތުން ކަލްޕަނާގެ ރޯލަށް ޕްރިޔަންކާ ލައިގެން ފިލްމް ޑައިރެކްޓް ކުރާނީ ޕްރިޔާ މިޝްރާ އެވެ.
އެހެން ނަމަވެސް ފިލްމާ ބެހޭ މާ ބޮޑު ތަފުސީލެއް މިހާތަނަކަށް އަދި ހާމައެއް ނުކުރެ އެވެ.
އެމެރިކާގެ ނާސާގެ އެސްޓްރޮނޯޓެއްގެ ގޮތުގައި އިތުރު ހަ ފަޅުވެރިއަކާ އެކު 2003 ގައި ޖައްވީ ސްޓޭޝަނަށް ކަލްޕަނާ ކުރާ ދަތުރުގައި އެ މީހުންގެ އުޅަނދު ގޮވައިގެން ހިނގާ ނުރައްކާތެރި ހާދިސާއެއްގައި އެންމެން މަރުވެ އެވެ.
އެ ހާދިސާ ހިނގާފައި ވަނީ ކަލްޕަނާ، 40، ޖައްވުގައި އުޅޭތާ 31 ދުވަހާއި 24 ގަޑި އިރާއި 54 މިނިޓްވެފައި ވަނިކޮށެވެ.
ނާސާ އިން ވަނީ މި ހާދިސާގައި ކަލްޕަނާ ދެއްކި ހިތްވަރުގެ އަގު ވަޒަންކޮށް، ނާސާ ޑިސްޓިންގްއިޝްޑް ސާވިސް މެޑަލާއި ނާސާ ފްލައިޓް މެޑަލްގެ އިތުރުން ކޮންގްރެޝަނަލް ސްޕޭސް މެޑަލް ވެސް އަރުވައިފަ އެވެ.
ކަލްޕަނާގެ ރޯލް ޕްރިޔަންކާ ކުޅޭ އިރު، ދެން އެންމެ އަވަހަށް އޭނަ ފެނިގެން ދާނީ އަންނަ މަހުގެ 10 ގައި ރިލީޒް ކުރާ "ބޭވޮޗް" އިންނެވެ.