އައްޑޫ ސިޓީ ކައުންސިލް އިދާރާގެ މުވައްޒަފުންނަށް އަމާޒުކޮށްގެން ދެ ތަމްރީނު ޕްރޮގްރާމެއް އިއްޔެ ފަށައިފި އެވެ.
މިތަމްރީނު ޕްރޮގްރާމްތަކަކީ ކައުންސިލް އިދާރާ އާއި ސިވިލް ސާވިސް ޓްރެއިނިންގް އިންސްޓިޓިއުޓް (ސީއެސްޓީއައި) އާ ގުޅިގެން މުވައްޒަފުންގެ ތެރެއިން އެގްޒެކެޓިވް ލެވެލްގެ މުވައްޒަފުންނަށް ޙާއްސަކޮށްގެން "ލީޑަޝިޕް ފޯ އެގްޒެކެޓިވްސް" ގެ ނަމުގައި އަދި ޖީއެސް 2،3،4 ގެ މުވައްޒަފުންނަށް "އިންގްލިޝް ފޯ އޮފީސް އެޑްމިނިސްޓްރޭޝަން" ގެ ނަމުގައި ހިންގާ ތަމްރީނު ޕްރޮގްރާމްކެކެވެ.
އެގްޒެކެޓިވް ލެވެލްގެ މުވައްޒަފުންނަށް ހިންގާ ތަމްރީނު ޕްރޮގްރާމް ނަންގަވައި ދެއްވަނީ ސީއެސްޓީއައިގެ ފަރާތުން އެކްސްޓާނަލް ޓްރެއިނާ މުޙައްމަދު ނަޒީފެވެ.
ޖީއެސް ރޭންކުގެ މުވައްޒަފުންނަށް ހިންގާ ތަމްރީނު ޕްރޮގްރާމް ނަންގަވައި ދެއްވަނީ ސީއެސްޓީއައި ގެ ފަރާތުން އާމިނަތު ޝިއުރާ އެވެ.
މިތަމްރީނު ޕްރޮގްރާމްތައް ހިންގުމަށް ހަމަޖެހިފައި ވަނީ ތިން ދުވަހުގެ މުއްދަތަކަށެވެ.
އަދި ތަމްރީނު ފުރިހަމަ ކުރާ މުވައްޒަފުންނަށް ސީއެސްޓީއައިގެ ފަރާތުން ސެޓްފިކެޓެއް ދޭ ގޮތަށް ހަމަޖެހިފަ އެވެ.