އިންޑިއާގެ މަޝްހޫރު އަންހެން ބެޑްމިންޓަން ކުޅުންތެރިޔާ ސައިނާ ނެހްވާލްގެ ހަޔާތުގެ މައްޗަށް ބިނާކޮށް ހަދާ ފިލްމްގައި ސައިނާގެ ރޯލް ކުޅެން ބަތަލާ ޝްރަދާ ކަޕޫރް ސޮއިކޮށްފި އެވެ.
ބުޝަަން ކުމާރްގެ ޓީ ސީރީޒުން އުފައްދާ މި ފިލްމް ޑައިރެކްޓް ކުރަން ހަމަޖެހިފައި ވަނީ "ތާރޭ ޒަމީން ޕަރް" ފަދަ ފިލްމްތައް ލިޔެ، "ސްޓޭންލީ ކޯ ޑައްބާ" އާއި "ހަވާ ހަވާއީ" ފަދަ ފިލްމްތައް ޑައިރެކްޓްކޮށްފައިވާ އަމޮލް ގުޕްތޭ އެވެ.
ސައިނާގެ ރޯލް ޝްރަދާ ކުޅޭ އިރު، މިއީ ފިލްމެއްގައި މަޝްހޫރު މީހެއްގެ ކެރެކްޓާ އޭނާ ކުޅޭ ފުރަތަމަ ފަހަރެއް ނޫނެވެ.
ޝްރަދާ ވަނީ އިންޑިއާގެ ގޭންގްސްޓާ ދާއޫދު އިބްރާހީމްގެ ދައްތަ ހަސީނާ ޕަރްކާރުގެ ހަޔާތުގެ ހަދާފައިވާ ފިލްމް "ހަސީނާ" ގައި ހަސީނާގެ ރޯލް ކުޅެފަ އެވެ. އެ ފިލްމް ސިނަމާތަކަށް އަންނާނީ 14 ޖުލައިގަ އެވެ.
ސައިނާގެ ރޯލް ސްކްރީންގައި ދައްކާލަން ފުރުސަަތު ލިބުމުން ވަރަށް ބޮޑަށް އުފާވެފައި ހުރި ޝްރަދާ ބުނީ އިންޑިއާގެ އެއް ވަނަ ބެޑްމިންޓަން ކުޅުންތެރިޔާ ސައިނާގެ ރޯލް ކުޅެން ލިބުމަކީ ބޮޑު ނަސީބެއް ކަމަށެވެ.
"ފިލްމަށް ތައްޔާރުވާން އަހަރެން މިހާރު މިހިރީ ކެތްތެރިކަން ވެސް ކުޑަވެފައި،" އަންނަ މަހުގެ 19 ގައި ރިލީޒް ކުރާ "ހާފް ގާލްފްރެންޑް" ގެ ބަތަލާ ބުންޏެވެ.
އިންޑިއާގައި މި ފަހުން ވަނީ މަޝްހޫރު ކުޅިވަރު ޝަހުސިއްޔަތުންތަކެއްގެ މައްޗަށް ވަރަށް ކާމިޔާބު ފިލްމްތަކެއް ހަދައިފަ އެވެ.
އޭގެ ތެރޭގައި ދުވުންތެރިޔާ މިލްކާ ސިންގްގެ ހަޔާތުގެ މައްޗަށް ހެދި "ބާގް މިލްކާ ބާގް" އާއި އަންހެން ބޮކްސިން ކުޅުންތެރިޔާ މޭރީ ކޮމްގެ ފިލްމް "މޭރީ ކޮމް" އާއި ކްރިކެޓް ކުޅުންތެރިޔާ މުހައްމަދު އަޒްހަރުއްދީންގެ ބައޮޕިކް "އަޒްހަރު" ގެ އިތުރުން ކްރިކެޓް ކުޅުންތެރިޔާ އެމްއެސް ދޯނިގެ ބައޮޕިކް "އެމްއެސް ދޯނި: ދި އަންޓޮލްޑް ސްޓޯރީ" ފާހަގަކޮށްލެވެ އެވެ.