ދާދި ފަހުން ވަރަށް ބޮޑަށް ބަލިވެގެން ހޮސްޕިޓަލްގައި އެޑްމިޓްކޮށްގެން ފަރުވާ ދިން ބޮލީވުޑްގެ ކުރީގެ މަޝްހޫރު އެކްޓަރު ވިނޯދް ކަންނާ މިއަދު މަރުވެއްޖެ އެވެ.
އިންޑިއާގެ ނޫސްތަކުން ރިޕޯޓްކޮށްފައިވާ ގޮތުގައި 70 އަހަރުގެ އެކްޓަރު މަރުވީ ވެސް މުމްބާއީގެ ހޮސްޕިޓަލެއްގައި ފަރުވާ ދެމުން ދަނިކޮށެވެ. އަދި އޭނާ އަށް ވަނީ ކެންސަރު ޖެހިފަ އެވެ.
ހޮސްޕިޓަލްގައި ވިނޯދް އޮއްވައި ނަގާފައިވާ ފޮޓޯއެއް ވެސް ދާދި ފަހުން ސޯޝަލް މީޑިއާގައި ދައުރުވި އެވެ. އެ ފޮޓޯގައި އޭނާ ފެންނަނީ ވަރަށް ބޮޑަށް ހިކި އަނަރޫފަވެ، ސިފަ ވެސް ވަރަށް ބޮޑަށް ބަދަލުވެފައި ހުއްޓަ އެވެ.
ބޮލީވުޑުން ފެނިގެން ދިޔަ އެންމެ ރީތި އެކްޓަރުންގެ ތެރޭގައި ހިމެނޭ ވިނޯދަކީ އެކްޓަރު އަކްޝަޔޭ ކަންނާ އާއި ރާހުލް ކަންނާގެ ބައްޕަ އެވެ.
އޭނާ ފިލްމީ ދާއިރާ އަށް 1968 ގައި ނިކުމެ މިހާތަނަށް ވަނީ 140 އަށް ވުރެ ގިނަ ފިލްމް ކުޅެފަ އެވެ.
ވިނޯދް މި ފަހުން ފެނިގެން ދިޔަ ފިލްމްތަކުގެ ތެރޭގައި "ދަބަންގް" އާއި "ދިލްވާލޭ" ފާހަގަކޮށްލެވެ އެވެ.
އޭނާ ކުޅެފައިވާ މަޝްހޫރު ބައެއް ފިލްމްތަކުގެ ތެރޭގައި "ގުރުބާނީ"، "އިމްތިހާން" އަދި "އަމަރް އަކްބަރު އެންތަނީ" ފަދަ ފިލްމްތައް ފާހަގަކޮށްލެވެ އެވެ.
ވިނޯދް ވަނީ ސިޔާސީ ދާއިރާގައި ވެސް މަސައްކަތްކޮށްފަ އެވެ. އެގޮތުން ކެބިނެޓް މިނިސްޓަރުކަމާއި ގާނޫނު ހަދާ މަޖިލީހުގެ މެމްބަރުކަން ވެސް ހިމެނެ އެވެ.