ބައެއް މީހުންނަށް ހިރުގަނޑުން ލޭ އައުމުގެ މައްސަލަ ވަރަށް ބޮޑަށް ކުރިމަތިވެފައިވެ އެވެ. ހާއްސަކޮށް ދަތް އުނގުޅާ އިރު، މި މައްސަލަ ވަކިން ބޮޑެވެ.
ހިރުގަނޑުން ލޭ އަންނަ ނަމަ އެއީ އާދައިގެ ކަމަކަށް ނުހަދާށެވެ. އެއީ ހިރުގަނޑަށް ބައްޔެއް ޖެހިފައިވާ ކަމުގެ އަލާމާތެކެވެ. އެހެންވެ ވީހާ ވެސް އަވަހަކަށް ޑޮކްޓަރެއްގެ ލަފާ ހޯދާށެވެ.
ހިރުގަނޑުން ލޭ އައުމުން ސަލާމަތްވާން އަމިއްލަ އަށް ކުރެވިދާނެ ކަންކަން ވެސް އެބަ ހުއްޓެވެ.
އެހެންވެ ދުރާލައި ފިޔަވަޅު އަޅައިގެން ހުރުން މާ ރަނގަޅެވެ. ރައްކާވެ ތިބިއްޔާ ދަތުރޭ ބުނާހެންނެވެ.
ދަތާއި ހިރުގަނޑާ ބެހޭ ތަޖުރިބާކާރުން ބުނާ ގޮތުގައި ހިރުގަނޑުން ލޭ އައުމުން ދުރުވުމަށްޓަކައި، ވިޓަމިން ސީ އެކުލެވޭ ކާނާގެ ބާވަތްތައް ކެއުން އިތުރު ކުރަން ޖެހެ އެވެ.
އޭގެ ތެރޭގައި ހުތް މޭވާ ފަދަ ތަކެތި ހިމެނެ އެވެ.
މިސާލަކަށް އޮރެންޖާއި ލުނބޯ ފަދަ ބާވަތްތެކެވެ. އަދި ކްރެންބެރީއަކީ ވެސް ހިރުގަނޑާ ވަރަށް ރައްޓެހި މޭވާއެކެވެ.
މީގެ އިތުރުން އެޕްރިކޮޓަކީ ވެސް ހިރުގަނޑުގެ ދުޅަހެޔޮ ކަމަށް ވަރަށް ފައްކާ މޭވާއެކެވެ. ގިނައިން އެޕްރިކޮޓް ކާ ނަމަ ހިރުގަނޑުގެ ސިއްހަތު ބަރާބާރު ވާނެ އެވެ.
ހަމަ މިއާ އެކު ކެރެޓާއި ސްޕިނެޗަކީ ވެސް ނުކައި ދޫކޮށްލާ ވަރުގެ ބާވަތްތަކެއް ނޫނެވެ. މިއީ ހަމަ ހިރުގަނޑުގެ ސިކިއުރިޓީންނެވެ.
ތަރުކާރީގެ ބާވަތްތައް ރޮލާ ކާ ނަމަ އެއީ ހިރުގަނޑުގެ ސަލާމަތާއި ރައްކާތެރި ކަމަށްޓަކައި ކުރެވިދާނެ ވަރަށް މުހިއްމު ކަމެކެވެ.
ދެން އޮތީ ކިރުގެ ވާހަކަ އެވެ. ކިރު ބޯން އާދަ ކުރާށެވެ. މިއީ ހިރުގަނޑުގެ ބާރު ގަދަކޮށްދޭ އެއްޗެކެވެ.