ހިތަދޫ ރީޖަނަލް ހޮސްޕިޓަލް (އެޗްއާއެރްއެޗް) ގެ ޖެނެރަލް އޯޕީޑީ އަނެއްކާ ވެސް މެދުކަނޑާލައިފި އެވެ.
މިއީ ޑޮކްޓަރަކު ނެތިގެން 3 ދުވަހުގެ ތެރޭގައި ހިތަދޫ ހޮސްޕިޓަލުގެ ޖެނެރަލް އޯޕީޑީ މެދުކަނޑާލި 2 ވަނަ ފަހަރެވެ.
ހިތަދޫ ހޮސްޕިޓަލުގައި މިވަގުތު މަސައްކަތް ކުރަމުން ގެންދަނީ އެންމެ 5 މެޑިކަލް އޮފިސަރުންނެވެ.
މައުލޫމާތު ލިބިފައިވާ ގޮތުގައި މިއަދު ޖެނެރަލް އޯޕީޑީ ބަންދުކޮށްފައި ވަނީ މެޑިކަލް އޮފިސަރަކު ސަލާމުގައި ހުރުމުގެ ސަބަބުންނެވެ. ހޮސްޕިޓަލުގައި އެންމެ 5 މެޑިކަލް އޮފިސަރުން ތިބުމުގެ ސަބަބުން ސަލާމުގެ ޗުއްޓީ އެއް ނެތި މަސައްކަތް ކުރަން ޖެހޭތީ އެކަމުގެ ޝަކުވާ ވަނީ ބޮޑުވެފައެވެ.
މިކަމާއި ބެހޭގޮތުން މައުލޫމާތު ހޯދުމަށް ހިތަދޫ ހޮސްޕިޓަލަށް ގުޅާލުމުން ބުނެފައި ވަނީ، "ދިމާވި މައްސަލަ އަކާއި ގުޅިގެން މިވަގުތަށް އޯޕީޑީ މެދުކަނޑާލާފައިވާ" ކަމަށެވެ. އެހެން ނަމަވެސް އެކަމާއި ގުޅޭ އިތުރު ތަފްސީލެއް ހޮސްޕިޓަލުން ނުދެއެވެ.