ކެންސަރަކީ ހަށިގަނޑުގައިވާ ސެލްތަކުގައި މިއުޓޭޝަން އުފެދުމުގެ ސަބަބުން، އެ ސެލްތައް އާދަޔާޚިލާފު ހަލުވި މިނެއްގައި ބޮޑުވާން ފެށުމަށް ކިޔާ ނަމެކެވެ.
ގިނަ ވައްތަރުގެ ކެންސަރުތަކަކީ ޖެނެޓިކްސްގެ ސަބަބުން ވާރުތަވާ ވައްތަރުތަކެވެ. އަނެއްބައި ވައްތަރުތަކުގެ ކެންސަރު ޖެހުމަށް މަގުފަހިވާ އެންމެ ބޮޑު ކަމަކީ މާބޮޑަށް ފަލަވުމެވެ.
1/3 ވައްތަރުތަކުގެ ކެންސަރަކީ ކައިބޮއެ އުޅޭ އެއްޗެހި އާއި، ކަސްރަތު ކުރާ މިންވަރާއި ޖުމްލަކޮށް ބަރުދަން ހުންނަ މިންވަރާއި ގުޅިފައިވާ ކެންސަރުތަކެވެ. އަދި ދުންފަތުގެ އިސްތިއުމާލު ކުރުމަށްވުރެ ވެސް ކެންސަރު ޖެހުމުގެ ފުރުސަތު ބޮޑުކޮށްދޭ ކަމަކީ މާބޮޑަށް ފަލަވުންކަން މިހާރު ވަނީ އެނގިފައެވެ.
ހަށިގަނޑަށް އަނިޔާއެއް ލިބިއްޖެނަމަ ނުވަތަ ބަލިވެއްޖެނަމަ، ދިފާޢީ ނިޒާމުން ހަށިގަނޑުގައި އިންފްލެމޭޝަން އުފައްދައެވެ.
ގިނަ ދުވަސްވެފައިވާ އިންފްލެމޭޝަން ތަކަކީ ކެންސަރު ސްލެތަކުގެ އަދަދު އިތުރުކޮށްދޭ ކަމެކެވެ. މާބޮޑަށް ފަލަވުމަކީ ދާއިމީ ގޮތުން އިންފްލެމޭޝާން މެދުވެރިވާ ކަމެކެވެ.
މާބޮޑަށް ފަލަވުމުގެ އިތުރުން ކެއުމުގައި ގެންގުޅޭ ބައެއް އާދަތަކުގެ ސަބަބުން ވެސް އިންފްލެމޭޝަން އަށް މަގުފަހިވެއެވެ. އެގޮތުން ގިނައިން ހަކުރާއި ފެޓްސް ހުންނަ އެއްޗެހި ކެއުން ހިމެނެއެވެ.
ބޮޑީ މާސް އިންޑެކްސް (ބީއެމްއައި) ކިތަންމެ ކުޑަ ނަމަވެސް، ބަނޑުގައި މާބޮޑަށް މަސްޖަހާފައި ހުރުމަކީ ހަށިގަނޑުގައި އިންފްލެމޭޝަން އުފައްދައިދޭ ކަމެކެވެ.
ބައެއް ކެންސަރުތަކަކީ އީސްޓްރޮޖެންފަދަ ޖިންސްތަކުގެ ހޯމޯންތަކާއި ގުޅިފައިވާ ވައްތަރުތަކެކެވެ. އެގޮތުން އަންހެނުންގެ ހަށިގަނޑުގައި ހުންނަ ފެޓް ސެލްތަކުން އީސްޓްރޮޖެން އުފައްދައިދެއެވެ. ހަށިގަނޑުގައި ފެޓްސް ހުންނަ މިންވަރު އިތުރުވާ ވަރަކަށް އީސްޓްރޮޖެން އުފެދޭ މިންވަރުވެސް އިތުރުވެގެން ދެއެވެ.
މާބޮޑަށް ފަލަވުން ނުވަތަ އޮބޭސިޓީ އަކީ އިންސުލިން ރެސިސްޓެންސް އަށް މަގުފަހި ކުރުވާ ކަމެކެވެ. އިންސުލިން ރެސިސްޓެންސްގައި ވާގޮތަކީ އިންސުލިން ހޯމޯން އަށް ހަށިގަނޑު ރެސްޕޮންޑް ކުރުން ހުއްޓާލަނީ އެވެ.
މީގެ ސަބަބުން ހަށިގަނޑުގައި އިންސުލިން އާއި އިންސުލިން އާއި ގުޅިފައިވާ އެހެނިހެން ހޯމޯންތަކުގެ އަދަދު އިތުރުވެގެން ދެއެވެ. އޭގެ ސަބަބުން ގިނަ ވައްތަރުތަކުގެ ކެންސަރަށް މަގުފަހިވެގެން ދެއެވެ.
މާބޮޑަށް ފަލަވުމުގެ ސަބަބުން ޖެހޭ ކެންސަރުތަކުގެ ތެރޭގައި ޔޫޓެރިން (އެންޑޯމެޓްރިއަލް)، ކޮލޮރެކްޓަލް، އީސޮފެގަލް، ކިޑްނީ، ޕެންކްރިއެޓިކް އަދި އުރަމަތީ ކެންސަރު ވެސް ހިމެނެއެވެ. އޭގެތެރެއިން ފަލަވުމުގެ ސަބަބުން ޖެހުމުގެ ފުރުސަތު އެންމެ ބޮޑީ ޔޫޓެރިން ކެންސަރެވެ.
މީގެ އިތުރުން އޮބޭސިޓީ ވަނީ ލިވާ ކެންސަރާއި ވެސް ގުޅުވާލެވިފައެވެ.
ކެންސަރުން ހަށިގަނޑު ސަލާމަތް ކުރާނީ ކިހިނެތް؟
ދުޅަހެޔޮ މިންވަރެއްގައި ހަށިގަނޑުގެ ބަރުދަން ބެހެއްޓުމާއި، މާބޮޑަށް ފަލަނަމަ ބަރުދަން ލުއި ކުރަން މަސައްކަތް ކުރުމަކީ ކެންސަރު ޖެހުމުގެ ފުރުސަތު ކުޑަކޮށްދޭ ކަމެކެވެ. އަދި އެގޮތަށް ކަންތައް ކުރުމަކީ ކެންސަރު ޖެހިއްޖެނަމަ، އޭގެ ސަބަބުން މަރުވުމުގެ ފުރުސަތު ވެސް ކުޑަކޮށްދޭ ކަމެކެވެ.
ބަރުދަން ލުއިކުރަން އެންމެ ރަނގަޅު ގޮތަކީ ދުޅަހެޔޮ ސިއްޙަތަށް ފައިދާހުރި އެއްޗެހި ކެއުމާއި ކޮންމެ ދުވަހަކުވެސް ކޮންމެވެސް ވަރަކަށް ކަސްރަތު ކުރުމެވެ.
ކަސްރަތު ކުރުމަކީ މަސްތަކާއި ކަށިތައް ރައްކާތެރިކޮށްދީ، އިންފްލެމޭޝަން އާއި ދެކޮޅަށް ހަނގުރާމަ ކުރުން ފަސޭހަކޮށްދޭ ކަމެކެވެ.