އިންޑިއާގެ ސްޓޭޓެއް ކަމަށްވާ މަދިޔަ ޕްރަދޭޝްގައި ހޮނިހިރު ދުވަހު އޮތް 700 އެއްހާ މީހުންގެ ބޮޑު ކައިވެނި ހަފުލާއެއްގައި، އެ ސްޓޭޓްގެ މިނިސްޓަރަކު ކައިވެނި ކުރި ހުރިހާ އަންހެނުންނަށް ހަދިޔާއަކަށް ލަކުނޑި ބެޓްތަކެއް ބައްސަވައިފި އެވެ.
އެކަމަކު މިއީ ކްރިކެޓް ކުޅެން ދެއްވި ބެޓްތަކެއް ނޫނެވެ. މީގެ މުހިއްމުކަން އަދި އެއަށް ވުރެ ބޮޑެވެ.
މިނިސްޓަރު ގޯޕާލް ބަރްގަވާ މި ލަކުނޑި ބެޓްތައް އަންހެނުންނަށް ހަދިޔާ ކުރެއްވި މައިގަނޑު ބޭނުމަކީ ފިރިންގެ ފަރާތުން އަނިޔާތަކާ ކުރިމަތިލާން ޖެހޭ ނަމަ، ދިފާއެއްގެ ގޮތުގައި ބޭނުން ކުރުމަށެވެ.
މިނިސްޓަރު ހަދިޔާ ކުރެއްވި ޒާތުގެ ލަކުނޑި ބެޓްތަކަކީ އިންޑިއާގެ ފަގީރު ސަރަހައްދުތަކުގެ ބައެއް މީހުން އަންނައުނު ދޮންނަ އިރު ބޭނުން ކުރާ ޒާތުގެ ބެޓްތަކެވެ.
މިނިސްޓަރު ދެއްވި ބެޓްތަކުގައި އިބާރާތްކޮޅެއް ވެސް ލިޔެފައިވެ އެވެ. އޭގައި ބުނަނީ "މިިއީ ރާބޯ ފިރިން ތަޅަން ހަދިޔާ ކުރާ ބެޓްތަކެއް ކަމަށާއި އެކަމާ ފުލުހުން ވެސް ނުބެހޭނެ" ކަމަށެވެ.
މިނިސްޓަރު ގޯޕާލް ވިދާޅުވި ގޮތުގައި ކައިވެނި ކުރި އަންހެނުންނަށް ލަކުނޑި ބެޓްތަކެއް ހަދިޔާ ކުރުމުގެ ވިސްނުން އައީ ގެވެށި އަނިޔާގެ ޝަކުވާ އަންހެނުންގެ ފަރާތުން ލިބޭލެއް ބޮޑުކަމުން ކަމަށެވެ.
އެހެންވެ މިނިސްޓަރުގެ މި ހަދިޔާއަކީ ފިރިންގެ ފަރާތުން އަނބިންނަށް އެއްވެސް ކަހަލަ އަނިޔާއެއް ކުރިމަތިވާ ނަމަ، ބޭނުން ކުރަން ދެއްވި ހަތިޔާރެކެވެ.