މެރިން ރިސާޗު ތަކަށް ޚާއްސަކޮށްގެން ޅ.ވައްވަރުގައި ޕްރޮފެސަރ އުގެއިލު ހިންގަވަމުން އައި ރިސާޗް ސެންޓަރުގެ މަސައްކަތް ހުއްޓާލައި އެ ރަށް ސަރުކާރާއި ހަވާލުކުރަން އަންގައިފިއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި "ކޮރަލިއަން ލެބް"ގެ ނަމުގައި ހިންގާ ލެބް ހުންނަ ޅ.ވައްވަރުގެ އެއްބަސްވުން ބާތިލް ކުރިކަން މިނިސްޓްރީ އޮފް ފިޝަރީޒް އެންޑް އެގްރިކަލްޗަރ އިން މިދިޔަ އަހަރުގެ ތެރޭގައި ވަނީ އަންގާފައެވެ.
ކޮރަލިއަން ލެބްގެ އެއްބަސްވުން ބާތިލްކޮށްފައި ވަނީ، މިނިސްޓްރީއަށް ހުށަހަޅަން ޖެހޭ ރިޕޯޓްތައް ހުށަހަޅާފައި ނުވާކަމަށް ބުނެއެވެ. އެހެން ނަމަވެސް އިތުބާރު ހުރި ގޮތެއްގައި 'އައްޑޫލައިވް' އަށް އެނގިފައިވާ ގޮތުގައި ކޮރަލިއަން ލެބްގެ ފަރާތުން ގެންދިޔައީ އީމެއިލް މެދުވެރިކޮށް ގަވާއިދުން ރިޕޯޓްތައް މިނިސްޓްރީ ފޮނުވަމުންނެވެ.
"ރިޕޯޓުތައް ހުށަނާޅާ ކަމަށް ބުނެ އެގްރިމެންޓް ބާތިލްކުރާ ވާހަކަ އެންގުމުން. ޕްރޫފް ދެއްކި. އެކަމަކު ފަހުން މިބުނަނީ 'ރަޖިސްޓާޑް ޕޯސްޓުންނޭ' ފޮނުވަން ޖެހޭނީ. އެގްރީމެންޓަކު ނީންނާނެ އެވާހަކައެއް." ކޮރަލިއަން ލެބްގައި މަސައްކަތް ކުރާ މުވައްޒަފަކު ބުންޏެވެ.
ދެހާސް ތޭރަ ވަނަ އަހަރު ހުޅުވި ކޮރަލިއަން ލެބަށް އެމެރިކާ އާއި އިނގިރޭސި ވިލާތް އަދި އޮސްޓްރޭލިޔާ ފަދަ ގައުމުތަކުގެ ކަނޑުގެ ދިރުންތަކާ ބެހޭ ސައިންސްވެރިންނާއި ޕްރޮފެސަރުން ވެސް އިންވެސްޓްކޮށްފައިވެއެވެ.
މި މައްސަލާގައި 'މިހާރު' ނޫހަށް ދެއްވި އިންޓަވިއުއެއްގައި ޕްރޮފެސަރު އުގައިލްއާ ވިދާޅުވީ ކުއްލި ގޮތަކަށް އެއްބަސްވުން އުވާލުމުން އެކަމާ ހިތާމަކުރަައްވާ ކަމަށެވެ.