އަމިއްލަ ބަޔަކު ރާއްޖޭގައި އޮޕަރޭޓް ކުރާ އެންމެ ބޮޑު އެއާލައިން މެގަ މޯލްޑިވްސްގެ އޮޕަރޭޝަންތައް ވަގުތީ ގޮތުން މެދުކަނޑާލަން ނިންމައިފި އެވެ.
މެގަ މޯލްޑިވްސް އެއާލައިނުން މިއަދު ނެރުނު ބަޔާނެއްގައި ބުނީ ފްލައިޓްތަކުގެ ހުރިހާ އޮޕަރޭޝަންތަކެއް މެދުކަނޑާލަން ނިންމާފައިވާ ކަމަށެވެ.
އެ ކުންފުނިން ބުނީ ފްލައިޓްތަކުގެ އޮޕަރޭޝަންތައް ހުއްޓާލި ނަމަވެސް، ކުންފުނީގެ އެހެން މަސައްކަތްތައް ކުރިއެކޭ އެއްގޮތަށް ކުރިއަށް ދާނެ ކަމަށެވެ.
ދެހާސް ދިހަ ވަނަ އަހަރުން ފެށިގެން އޮޕަރޭޓް ކުރަމުން އަންނަ މެގަ މޯލްޑިވްސްގެ ހިދުމަތް މެދުކަނޑާލާ އިރު، ކުންފުނީގެ ހިންގުމަށް އެދެވޭ ބަދަލުތަކެއް ގެންނަން މަސައްކަތް ކުރަމުން އަންނަ ކަމަށެވެ.
އަދި ފާއިތުވި މުއްދަތުގެ ތެރޭގައި އެ އެއާލައިނަށް ތަފާތު ގޮންޖެހުންތަކާ ކުރިމަތިލާން ޖެހިފައިވާ ކަމަށް ބުނެފައިވެ އެވެ.
ރާއްޖޭން ބޭރަށް ވަރަށް ފުޅާކޮށް ދަތުރުފަތުރުގެ ހިދުމަތް ދެމުން ދިޔަ މެގަ މޯލްޑިވްސް އިން އަދި ބުނީ ކުންފުންޏަަށް ބަދަލުތަކެއް ގެނެސް އަލުން އޮޕަރޭޝަންތައް ފަށާނީ ކުރިއަށް ވުރެ ރަނގަޅު ހިދުމަތްތަކާ އެކުގައި ކަމަށެވެ. އެގޮތުން ފްލީޓަށް ބޯޓްތަކެއް އިތުރު ވާނެ ކަމަށް ވެސް ބުނެފައިވެ އެވެ.
އަދި މާ ލަސްތަކެއް ނުވެ އަލުން އޮޕަރޭޝަން ފެށޭނެ ކަމުގެ އުންމީދު ބޮޑު ކަމަށް މެގަ މޯލްޑިވްސް އިން ބުންޏެވެ.
އެ ކުންފުނިން ހިދުމަތް ދޭން ފެށި ފަހުން މިހާތަނަށް ވަނީ 50 މަންޒިލަކަށް ދަތުރުކޮށް 1.1 މިލިއަން ޕަސެންޖަރުން އުފުލައިފަ އެވެ.
މެގަ މޯލްޑިވްސްގެ އޮޕަރޭޝަންތައް ހުއްޓާލައިފައި މި ވަނީ އެ ކުންފުނީގެ ބޮޑު ހިއްސާއެއް ވިޔަފާވެރިއަކަށް ވިއްކާލުމުގެ އަޑުތަކެއް ފެތުރި، ސަރުކާރުގެ ތެރެއިން ވެސް ޕްރެޝަރުތަކެއް ކުރިމަތިވެފައިވާ ކަމަށް އަޑުތައް ފެތުރިފައިވާ ދަނޑިވަޅެއްގަ އެވެ.