އައްޑޫ ސިޓީ ކައުންސިލްގެ މެމްރުންގެ ތެރެއިން ފާއިތުވި މުއްދަތު ތެރޭގައި ކައުންސިލްގެ ގޮނޑި ހޫނު ކުރެއްވީ ހުޅުމީދޫ ކައުންސިލަރު އަލީ މުހައްމަދު (އައްދު) އަށް ވެދާނެ ކަމަށް އައްޑޫ މޭޔަރު އަބްދުﷲ ސޯދިގް (ސޯބެ) ރޭ ވިދާޅުވެއްޖެ އެވެ.
އަންނަ ހޮނިހިރު ދުވަހު ބާއްވާ ލޯކަލް ކައުންސިލް އިންތިހާބަށް ކެމްޕޭން ކުރުމުގެ ގޮތުން ހުޅުމީދޫގައި ރޭ ބޭއްވި އެމްޑީޕީ ޖަލްސާގައި މޭޔަރު ވިދާޅުވީ އެންވަޔަރަމަންޓް މިނިސްޓަރު ތޯރިގް އިބްރާހީމް މިދިޔަ ހަފުތާގައި އައްޑު އަށް ކުރެއްވި ދަތުރުގައި ކައުންސިލް މިހާތަނަށް ކުރި ކަމަކީ ގޮނޑި ހޫނު ކުރެއްވުން ކަމަށް ވިދާޅުވީ ޕީޕީއެމަށް ނިސްބަތްވާ ކައުންސިލަރު އައްދު އަށް މަލާމާތް ކުރެއްވުމުގެ ގޮތުން ކަމަށެވެ.
އެމްޑީޕީ ޓިކެޓްގައި ކައުންސިލަށް ހޮވިވަޑައިގަތުމަށް ފަހު، ޕީޕީއެމާ ފަހުން ގުޅިވަޑައިގަތް އައްދުއަކީ ހުޅުދޫ ދާއިރާ އަށް ޕީޕީއެމް ޓިކެޓްގައި މި ފަހަރު ވާދަ ކުރައްވާ ކެންޑިޑޭޓް ވެސް މެ އެވެ.
"ތޯރިގް ވަޑައިގެން މިތާގައި ހޮޅި ހަޅަމުން ވިދާޅުވަނީ [ކައުންސިލަރުން] ގޮނޑި ހޫނު ކުރާށޭ ތިބީ. އަޅުގަނޑަށް ހީވަނީ އެއީ ހުޅުމީދޫ ދާއިރާގެ ކައުންސިލަރު އަލީ މުހައްމަދަށް ހަމަ ކުރި މަލާމާތެއް އެއީ،" ސޯބެ ވިދާޅުވި އެވެ. "އެމްޑީޕީގެ ޓިކެޓްގަ ހޮވިގެން އެމްޑީޕީ ކައުންސިލަރަކަށް ހުރެފައި ޕީޕީއެމަށް ބަދަލުވީމާ އިސްމެހެލާހެރަ އާއި އެތައް ކަމެއްގެ ވައުދުވެސް، އެއްވެސް ކަމެއް ކޮށް ނުދީ އައިއްސަ މަލާމާތެއްކޮށްފައި ގޮނޑި ހޫނު ކުރާށޭ ތިއިނީ އެ ބުނީ. ދެން އަލީ މުހައްމަދު ގޮނޑި ހޫނު ކުރަނީ ކަމަށް ވެދާނެ."
މޭޔަރު ވިދާޅުވީ ކައުންސިލުން ހަރަދުކޮށްގެން އައްޑޫގެ އަވަށްތަކުގައި ސްވިމިން ޓްރެކް އަޅައި، އައުޓް ޑޯ ޖިމްސެޓާ އެއްޗެހި ބަހައްޓައި ބޭނުން ކުރަން ފެށި އިރު، ހުޅުމީދޫގައި ހުރީ އެ ވަސީލަތްތައް އަދިވެސް ގާއިމު ނުކުރެވި ކަމަށެވެ.
އެހެން ނަމަވެސް އެކަމަށް ބޭނުންވާ ތަކެތި ހޯދާފައި ހުރި ކަމަށް ވިދާޅުވި އެވެ.
"ބައްލަވާ ތި ބޭފުޅުންގެ ކުދިން، ތި ބޭފުޅުން ފަތަން އަޅަން ގެނައި ޓްރެކް އެ އޮތީ ހުޅުދޫ އަވަށު އޮފީހުގައި ބާއްވާފައި. ގޮނޑި ހޫނު ކުރަން [ކައުންސިލަރު] އެ އިންނަވަނީ އެ ޓްރެކް ނާޅުއްވާ،" ސޯބެ ވިދާޅުވި އެވެ. "މި ފާއިތުވެ ދިޔަ ދެ އަހަރުގެ ތެރޭގައި އެބޭފުޅާ އެ ސްވިމިން ޓްރެކެއް ނޭޅި. ދެން ކީއްކުރަންތޯ ބައިންދަންވީ؟ މިތަނުގެ ބަހައްޓަން ގެނައި ޖިމް ސެޓް އެ އޮތީ އަދިވެސް. އެ ބޭފުޅާ ހަމަ އެ އިންނަވަނީ ގޮނޑި ހޫނު ކުރައްވަން. އަލީ މުހައްދަށް ތޯރިގް ހަމަ މަލާމާތް ކުރައްވައިފި."
ހިތަދޫ އުތުރު ދާއިރާ އަށް ތިން ވަނަ ދައުރަކަށް ކުރިމަތިލައްވާފައިވާ ސޯބެ ވިދާޅުވީ މި ސަބަބުތަކާ ހެދި ހުޅުދޫ ދާއިރާ އަށް އައްދު ހޮވަން ޖެހޭ ސަބަބެއް ނެތް ކަމަށެވެ.
"އެހެންވީމާ އަނެއްކާ ވެސް އަލީ މުހައްމަދަށް ވޯޓް ޖައްސަވާނެ ކަމެއް ނެތޭ. އަޅުގަނޑުގެ ވަރަށް ގާތް އެކުވެރިއެއް އެއީ. އެހެން ނަމަވެސް ބުނަންވާ އެއްޗެއް ބުނަން ޖެހޭނެ. މިހާރު އަލީ މުހައްމަދަށް ގޮނޑި ހޫނު ކުރަން ޖެއްސީ ތޯރިގާއި ޕީޕީއެމްގެ ބޭފުޅުންނޭ،" މޭޔަރު ވިދާޅުވި އެވެ.
ސޯބެ ވިދާޅުވީ އައްދުގެ ބަދަލުގައި ރައްޔިތުން މި ފަހަރު ވޯޓް ދޭންވީ އެމްޑީޕީ ކެންޑިޑޭޓް ޝުކުރީ އަށް ކަމަށެވެ.