ޓައިގާ ޝްރޮގް ވަރުގަދަ އެކްޝަން ރޯލަކުން ފެނިގެން ދިޔަ މިދިޔަ އަހަރުގެ ކާމިޔާބު ފިލްމް "ބާގީ" ގެ ދެވަނަ ބައި "ބާގީ 2" ގެ ޕޯސްޓަރު ދައްކާލައި ފިލްމް ރިލީޒް ކުރާ ތާރީހު އިއުލާންކޮށްފި އެވެ.
މި ފިލްމް ސިނަމާތަކަށް އަންނާނީ އެޕްރީލް 27، 2018 ގަ އެވެ.
ކުރީގެ ފިލްމާ އެއްގޮތަށް ފިލްމުގެ ލީޑުން ޓައިގާ ފެނުނު ނަމަވެސް "ބާގީ 2" އަށް ވަނީ ބައެއް ބަދަލުތައް އައިސްފަ އެވެ.
"ބާގީ" ޑައިރެކްޓް ކުރީ ޓައިގާގެ ފުރަތަމަ ފިލްމް ވެސް ޑައިރެކްޓް ކުރި ސަބީރް ހާން ކަމަށް ވިޔަސް، ދެވަނަ ބައި ޑައިރެކްޓްކޮށްފައި ވަނީ މަޝްހޫރު ކޮރިއޮގްރާފަރު އަހުމަދު ހާނެވެ.
އަދި ފިލްމުގެ ބަތަލާއަކަށް ޝްރަދާގެ ބަދަކުގައި ނަގާފައި ވަނީ އާ ބަތަލާއެކެވެ.
"ބާގީ 2" ގެ ޕޯސްޓަރުން ފެންނަނަ ގޮތުގައި މި ފިލްމުން ޓައިގާ ފެނިގެން ދާނީ ތަފާތު ލުކަކާ އެކުގަ އެވެ. މިހާތަނަށް އޭނާ ފެނިފައި ވަނީ މުޅިން ވެސް ދިގު އިސްތަށިގަނޑަކާ އެކު ކަމަށް ވިޔަސް، މި ފިލްމުން ފެންނާނީ ކުރު ހެއާ ސްޓައިލަކާ އެކުގަ އެވެ.
އަދި ހަމައެއާ އެކު ވަރަށް ވަރުގަދަ ހަށިގަނޑަކާ އެކުގަ އެވެ.
"ބާގީ 2" ވެސް ޕްރޮޑިއުސްކޮށްފައި ވަނީ "ބާގީ" ޕްރޮޑިއުސް ކުރި ސާޖިދު ނަދިއަދްވާލާ އެވެ.
ޓައިގާ ދެން އެންމެ އަވަހަށް ފެނިގެން ދާނީ ސަބީރު ޑައިރެކްޓް ކުރާ "މުންނާ މައިކަލް" އިންނެވެ.