ރައީސުލްޖުމްހޫރިއްޔާ އަލްފާޟިލް ޔާމީން އަބްދުލް ޤައްޔޫމް ކުރައްވަން ޖެހޭ ކަމަކީ ކަތީބު ސިސްޓަމް އައްޔަން ކުރުން ކަމަށް އައްޑޫ ސިޓީގެ މޭޔަރ، އަބްދުﷲ ސޯދިޤް ވިދާޅުވެއްޖެއެވެ.
ހިތަދޫ އެމްޑީޕީ ހަރުގޭގައި މިރޭ ބާއްވަމުން ގެންދާ ޖަލްސާގައި ވާހަކަ ދައްކަވަމުން ސޯބެ ވިދާޅުވީ ރައީސް ޔާމީން ކުރައްވަން ޖެހޭ ކަމަކީ، ކަތީބުން އައްޔަން ކުރުން ކަމަށެވެ.
އައްޑޫ ސިޓީ ކައުންސިލުން އެއްވެސް ކަމެއް ނުކުރެވޭ ކަމަށް ސަރުކާރުގެ އިސްވެރިން ވިދާޅުވެ ދައްކަވާ ވާހަކަތަކަށް ވެސް ސޯބެ ވަނީ ރައްދު ދެއްވާފައެވެ.
ސޯބެ ވިދާޅުވި ގޮތުގައި އައްޑޫގައި ހުރި ފުޓްބޯޅަ ދަނޑުތަކުގައި ފެންސް ޖަހައި ބޮކި ދިއްލާފައި ވާ ކަމަށާއި ކަސްރަތު ކުރާނެ ވަސީލަތް ގާއިމްކޮށް ޕާކުތައް ވެސް ގާއިމްކޮށްދީފައިވާ ކަމަށެވެ.
އައްޑޫ ސިޓީ ކައުންސިލަށް ކަންތައް ކޮށްދެވެން އޮތް މިންވަރުން ކަންތައް ކޮށްދެއްވަމުން ގެންދަވާ ކަމަށާއި އެގޮތުން ކައުންސިލްގެ ފަރާތުން މުނިސިޕަލް ޚިދުމަތް ވެސް ފޯރުކޮށްދީފައި ވަނީ އެންމެ ފުރިހަމައަށް ކަމަށް ސޯބެ ވިދާޅުވިއެވެ.
"ކަންތައް ކުރަން ތިބި މީހުންނަށް ވާން އޮތް ވަރަކުން ކަންތައް ކޮށްދީފައި އޮތީ، ސިވިމިން ޓްރެކް އަޅާއި ދީފައި އޮތީ.ކައުންސިލުން މުނިސިޕަލް ހިދުމަތް ދިނީ އެކަން ކުރަން ޖެހޭ ވަރަށް ފުރިހަމައަށް."
ސޯބެ ވިދާޅުވި ގޮތުގައި އިރާދަކުރެއްވިއްޔާ އެމްޑީޕީގެ 7 ކެންޑިޑޭޓުން އައްޑޫ ކައުންސިލަށް އިންތިޚާބު ކުރުމަށް ފަހު ރައީސް މުހައްމަދު ނަޝީދު ވެސް އެމްޑީޕީ މެންބަރުން އިންތިޚާބު ކުރާނެ ކަމަށެވެ.