ފިލްމެއްގައި ދައްކުވައި ދޭން ޖެހޭ ކެރެކްޓާއަކަށް އާމިރް ހާން ނޫނީ އެހާ ފައްކާކޮށް ތައްޔާރުވާ އެކްޓަރެއް ބޮލީވުޑުން މަދުން ނޫނީ ނުފެންނާނެ އެވެ.
މިދިޔަ އަހަރު ރިލީޒް ކުރި "ޑަންގަލް" އިން ވެސް އޭނާ ވަނީ އެކަން ވަރަށް ރަނގަޅަށް ސާބިތުކޮށް ދީފަ އެވެ.
އެ ފިލްމުގައި ކުޅެން ޖެހުނު ރޯލަށް އޭނާ ވަނީ ވަރަށް ބޮޑަށް ބަރުދަން އިތުރުކޮށް، ބޮޑު ބަނޑެއްލައި، ފަހުން ހަމަ އެ ރޯލަށް ބަރުދަން ލުއިކޮށް، މުޅި މީހާ އަށް ބޮޑު ބަދަލެއް ގެނެސްފަ އެވެ.
މި ފަހަރު ވެސް މިއޮތީ އެކަހަލަ ވާހަކަ އެވެ. މި ފަހަރު އާމިރް ކުރި ކަމަކީ ނޭފަތް ތޮރުފާލައި މުދިލުމެވެ.
އޭނާގެ ކުރިއަށް އޮތް ފިލްމް "ތަގްސް އޮފް ހިންދުސްތާން" އަށް މިހާރު އަންނަނީ ވަރަށް ބޮޑަށް ތައްޔާރުވަމުންނެވެ.
އެގޮތުން ތުނިބުޅި ބެސް ބައްޓަންކޮށް، މަތިމަަސް ވެސް ތަފާތު ގޮތަކަށް ބަހައްޓައި ހެއާ ސްޓައިލަށް ވެސް މި ފަހުން ބަދަލުތަކެއް ގެނެސްފައި ހުއްޓައި ވަނީ ފެނިފަ އެވެ.
And when you meet the 'inspiration' in the process:)#perfectionist pic.twitter.com/EWQ7V8TOux
— SHIV Sushant Rajput (@itsSSR) May 2, 2017
ޒުވާން އެކްޓަރު ސުޝާންތު ސިންގް ރާޖްޕުޓްއާ އެކު ޖިމެއްގައި ނަގާފައިވާ ފޮޓޯއެއް، ސުޝާންތު ސޯޝަލް މީޑިއާގައި ހިއްސާ ކުރި އިރު، އެ ފޮޓޯގައި އާމިރް ފެންނަނީ ނޭފަތް ތޮރުފައިގެން ހުއްޓަ އެވެ.
އެހެންވެ ގަބޫލް ކުރެވޭ ގޮތުން އެއީ "ތަގްސް އޮފް ހިންދުންސްތާން" އަށް ގެނައި ބަދަލެކެވެ.
"ދޫމް 3" ގެ ޑައިރެކްޓަރު ވިޖޭ ކްރިޝްނާ އަޗަރިއާ (ވިކްޓަ) ލިޔެ، ޑައިރެކްޓް ކުރާ އެ ފިލްމުގެ ޝޫޓިން އަންނަ މަހު ފަށާނެ އެވެ.
އާމިރާ އެކު "ތަގްސް އޮފް ހިންދުންސްތާން" އިން އަމީތާބް ބައްޗަން ވެސް ފެނިގެން ދާނެ އެވެ.