ފޭދު އަށް ނިސްބަތްވާ ޒުވާން ބްލޮގަރ ޔާމީން ރަޝީދު މަރާލި މައްސަލައިގެ ތުހުމަތަށް އިތުރު މީހަކު ހައްޔަރުކޮށްފި އެވެ.
މިއީ ޔާމީންގެ މަރުގެ މައްސަލައިގައި ފުލުހުންގެ ބެލުމުގެ ދަށަށް ގެންދިޔަ ދެވަނަ މީހާ އެވެ.
ޔާމީން މަރާލިކަމުގެ ތުހުމަތުގައި މިދިޔަ ހޯމަ ދުވަހު 18 އަހަރުގެ މީހަކު ވެސް ފުލުހުން ވަނީ ހައްޔަރުކޮށްފަ އެވެ.
އެ މީހާ އަކީ ޔާމީން މަރާލި ރޭގައި ފާރަލައި ޔާމީންގެ ހަރަކާތްތައް ބަލަން އުޅުނު މީހެއް ކަމަށް ބައެއް މީޑިޔާތަކުގައި ރިޕޯޓްކޮށްފައި ވެއެވެ.
މި މައްސަލައިގައި ފުލުހުންގެ ބެލުމުގެ ދަށަށް އިއްޔެ ގެންދިޔަ މީހާގެ ވަނަވަރު 'އައްޑޫލައިވް' އަށް ލިބިފައިވީ ނަމަވެސް އަބުރު ރައްކާތެރިކުރުމާ ހިޔާލުފާޅު ކުރުމުގެ މިނިވަންކަމުގެ ގާނޫނު އޮތް ގޮތުން އެ މައުލޫމާތު ހާމަކުރެވޭކަށް ނެތެވެ.
ސަރުކާރުގެ ކުންފުންޏެއްގައި މަސައްކަތް ކުރާ މީހާ ފުލުހުންގެ ބެލުމުގެ ދަށަށް ގެންގޮސްފައި ވަނީ އިއްޔެގެ ވަގުތެއްގަ އެވެ.