އިންޑިއާގެ ޓީވީ ސިލްސިލާތައް ކުޅޭ ތަރިންގެ ތެރޭގައި ހިމެނޭ މަޝްހޫރު ބަތަލާ މޯނީ ރޯއި ބޮލީވުޑަށް ލޯންޗް ކުރަން ސަލްމާން ހާން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
އިންޑިއާގެ ބައެއް ނޫސްތަކުގައި ބުނެފައި ވަނީ ކަލާޒް އިން މިހާރު ދައްކާ "ނާގިން" ގައި ލީޑް ރޯލް ކުޅޭ ބަތަލާ އަށް، ސަލްމާން ޕްރޮޑިއުސް ކުރާ ފިލްމަކުން ފުރުސަތު ދޭން ނިންމާފައިވާ ކަމަށެވެ.
އެހެން ނަމަވެސް އެއީ ކޮން ފިލްމެއް ކަމެއް ބުނެފައެއް ނުވެ އެވެ.
މިކަމާ ބެހޭ ގޮތުން ސަލްމާން ވެސް އަދި މޯނީ ވެސް އެއްވެސް ވާހަކައެއް ނުދައްކަ އެވެ.
ބޮލީވުޑްގެ ފިލްމެއްގައި މޯނީ މިހާތަނަށް މުހިއްމު ރޯލެއް ކުޅެފައި ނެތަސް، މިދިޔަ އަހަރު އަނޫބަވް ސިންހާ ގެނެސް ދިން ލޯބީގެ ފިލްމް "ތުމް ބިން 2" ގެ ހާއްސަ ލަވައަކުން މޯނީ ފެނިފައިވެ އެވެ.
ސަލްމާން ހޯސްޓް ކުރާ "ބިގް ބޮސް" ގެ ސީޒަނަކުން މޯނީއާ ދިމާވި ފަހުން، ސަލްމާން ވަނީ މޯނީ އަށް ވަރަށް ބޮޑަށް ތައުރީފުކޮށް، އެކި ފަހަރުމަތިން ވާހަކަ ދައްކައިފަ އެވެ.
ސަލްމާން ބުނެފައިވާ ގޮތުގައި މޯނީ، 31، އަކީ ވަރަށް ރީތި އަދި މޮޅު ބަތަލާއެކެވެ.
މީގެ ކުރިން ވެސް ސަލްމާން ވަނީ ބޮލީވުޑުން ކުރިއަށް ދާން ގިނަ ބަތަލާއިންތަކަކަށް ފުރުސަތުތައް ފަހިކޮށް ދީފަ އެވެ.
އޭގެ ތެރޭގައި ކެޓްރީނާ ކެއިފް، ސޮނާކްޝީ ސިންހާ، ޑެއިޒީ ޝާހް، ޒަރީން ހާން އަދި އާތިޔާ ޝެޓީ ފަދަ ބަތަލާއިން ހިމެނެ އެވެ.